KRALENDIJK — ‘Tene Pia Seku’ ta uni fotografia dokumental i investigashon internashonal ku nos arte kontemporáneo lokal, perspektiva históriko i konosementu komunitario. E eksposishon ta analisá kon subida di nivel di laman, kambio ambiental i desigualdat sosial ta reformá e relashon entre hende, awa i lugá.
Na inisio di e eksposishon ta presentá ‘Rising Tide’ , ku ta enfoká riba e trabou di e fotógrafo rekonosí internashonalmente Kadir van Lohuizen, presentá aki den kolaborashon ku Het Scheepvaartmuseum . Su narativa visual i e enfoke aktivista ku a inspirá e proyekto aki pa hopi aña, ta ser poné den un diálogo ku kontribushon di artista boneriano. Ghislaine Monte i Nicole Peiliker ta mustra e generashon aktual i e preokupashon ku nan ta sinti pa e impakto di kambio di klima riba nos kultura. Kenny Ranking ta dokumentá bida na nos kosta i Marieke Knol ta yuda nos reflekshoná i apsorbé e storia aki. E elemento lokal aki ta reflehá e resiliensia di e isla i su paisahe kultural, ekológiko i sosial.
E eksposishon ta keda enrikesé mas ahinda pa e investigashon i e trabou ‘How to care for Bonaire’ di Prof. Dr. Simon Richter, huntu ku e eksperensia bibá di lidernan komunitario Norwin Willem, Anjelica Cicilia i Barbara Griot. Nan storia ta basá riba e proyekto di investigashon Klima i Desigualdat di Género , enkargá pa Ministerio di Edukshon, Kultura i Siensia di Hulanda i realisá pa Climate Adaptation Services, Hogeschool Rotterdam i Terramar Museum. Nan kontesta den e entrevista ta brinda informashon balioso tokante e dimenshon sosial di kambio di klima i e manera ku reto ambiental ta krusa ku kuestion di género, nesesidat, herensia i resiliensia komunitario.
No enfokando solamente riba e riesgo di kambio di klima, ‘Tene Pia Seku’ ta resaltá resiliensia, adaptashon i akshon personal. Pa medio di storianan di maneho di awa tantu históriko komo kontemporáneo, konservashon ambiental i inisiativa komunitario, e ta invitá e bishitante pa reflekshoná riba e vulnerabilidat i forsa di e komunidat riba e islanan.
‘Tene Pia Seku’ a ser desaroyá a base di un kolaborashon entre Het Scheepvaartmuseum di Hulanda, e Asosiashon di Museo i Herensia di Kòrsou, Terramar Museum Bonaire, Cultuurfonds Caribisch Gebied i Mondriaan Fonds. ‘Tene Pia Seku’ lo ta presentá na dos lokashon den Karibe.
For di dia 8 di ougùstùs
E eksposishon ta habri na Terramar Museum na Boneiru for di 8 di ougùstùs te ku 1 di desèmber i ta kontinuá na Habaai Art Gallery na Kòrsou for di 27 di ougùstùs te ku 23 di novèmber. Kada lokashon ta presentá un interpretashon úniko ku ta respondé na su propio konteksto lokal, miéntras e ta kontribuí na un diálogo karibense en komun tokante di resiliensia klimatológiko. E apertura na Boneiru dia 8 di ougùstùs 2026 lo kuminsá 19:30 na Terramar Museum.