KRALENDIJK – Konseho Insular di Boneiru ke pa koperashon di agrikultura KRIABON no ta dependé mas di supsidionan insidental, pero ku e ta haña sosten struktural. Un moshon ku a aprobá ta hasi un yamada na Konseho Ehekutivo pa sera un kombenio di prestashon di mas aña ku e organisashon riba término korto. Ku esaki mester fortifiká agrikultura lokal i garantisá seguridat di kuminda mihó riba e isla.
Segun e moshon Boneiru ta hopi dependiente ainda di komestibel importá i material agríkola. Subidanan di preis internashonal, gastunan mas haltu di transporte i estorbonan den kadena logístiko tin konsekuensia dirèkt pa tantu habitante komo kunukeronan lokal. Gastunan di kuminda di bestia i otro poduktonan agríkola ku tambe ta subi ta pone preshon riba kontinuidat di empresanan agríkola.
Konseho Insular ta mustra ku Boneiru tin e ambishon pa produsí lokal 23 porshento di kuminda. KRIABON ta hunga un ròl prinsipal segun e moshon danki na e struktura koperativo, konosementu di práktika i koperashon dirèkt ku kunukeronan. Konseho Ehekutivo a sostené e organisashon finansieramente insidentalmente den pasado kaba, entre otro pa waya pa parselanan agríkola i reparashon despues di daño di kandela.
Den e moshon tin pará ku un sektor agrario fuerte ta esensial pa seguridat di kuminda, outosufisiensia, servisionan básiko pagabel i kombatimentu di pobresa na Boneiru. P’esei e outornan ta haña ku un kolaborashon struktural entre Entidat Públiko Boneiru i KRIABON ta ofresé mas kontinuidat i garantia atministrativo ku supsidionan di proyekto òf emergensia lòs.
Kombenio di prestashon di mas aña
Kolegio Ehekutivo ta haña e tarea pa drenta den kòmbersashon ku KRIABON tokante un kombenio di prestashon di mas aña òf un konstrukshon hurídiko similar. Eiden mester stipulá palabrashonnan konkreto i ku por midi di entre otro disponibilidat i aksesibilidat di kuminda di bestia i artíkulonan agrario, sosten na kunukeronan, disponibilidat di servisio i responsabilisashon finansiero. Tambe mester investigá kon un kompensashon finansiero struktural por yuda pa kompensá parsialmente gastunan di kompra, transporte i logístiko ku a subi.
Pa mas tardá dos luna despues ku a aprobá e moshon Kolegio Ehekutivo mester informá Konseho Insular por eskrito e resultadonan di negosiashon ku KRIABON, e forma di kontrato ku a skohe, kobertura finansiero, akuerdo di prestashon ku a proponé i e skema di tempu pa ehekushon.
Lesa aki e moshon kompleto di Konseho Insular