KRALENDIJK – Piskamentu tradishonal di masbangu na Boneiru a kondusí na un diskushon fuerte entre diferente partido. Organisashon di Derechonan Humano di Boneiru (BHRO) ta plantia e kestion komo un asuntu di derechonan humano. Plataforma Boneiru Nobo i Mas Outónomo (PBNO) ta rechasá esei i ta mir’é komo un asuntu di maneho lokal. Gunther Flanegin, kapitan di haf ta mustra riba un riesgo di seguridat konkreto: redanan den haf por bruha den chapaleta di botonan.
BHRO: asuntu di derechonan humano i derechonan di e pais mes
Organisashon di Derechonan Humano di Boneiru ta promé ku a bati bèl. Segun BHRO outoridatnan di haf a dirigí nan mes na e piskadónan durante nan aktividatnan tradishonal di reda, mientras tradishonalmente nan ta ehersé e piskamentu di masbangu eksistente. E organisashon ta kalifiká esei komo un posibel violashon di derechonan humano, derechonan di kultura i derechonan di e pais mes, i ta referí na Artíkulo 73 di e Karta di Nashonnan Uní. BHRO ta mara e asuntu tambe na e diskushon mas ámplio di un posibel reinkorporashon di Boneiru riba lista di Nashonnan Uni pa Teritorionan sin outonomia propio.
PBNO: no tin prohibishon, pero si falta di konsultá
PBNO na su turno ta haña ku e reklamó di derechonan humano di BHRO no ta relevante. Seramentu di masbangu den reda ta eksplísitamente pèrmití pa añanan largu kaba dentro di lei di Parke Marino Nashonal di Boneiru, bou di kondishon ku tin supervishon riba e redanan i liberá eventual turtuganan ku drenta e reda. Pues no por papia di un prohibishon di Hulanda segun PBNO.
Loke si tabata falta tabata konsulta previo. Pa kompará PBNO ta referí na seramentu anteriormente di e pir di piskadó, kaminda Entidat Públiko di Boneiru, Kuerpo Polisial Karibe Hulandes, Marechaussee, STINAPA, Kapitan di haf i koperativa Piskabon a sinta na mesa promé. Segun e organisashon esei mester a sosodé awor tambe.
Kapitan di haf: chapaletanan ta bruha den e redanan
Kapitan di haf Gunther Flanegin ta trese un argumento di seguridat práktiko dilanti. Redanan ku tin den haf por bruha den e chapaletanan di botonan ku ta drenta òf bandoná haf. Esei ta forma un peliger pa tantu tráfiko marítimo komo e piskadónan mes tambe. Ku esaki su aktuashon tabata lòs di un punto di bista di prinsipio tokante pèrmití piskamentu di masbangu, tabata trata mantenshon a base di seguridat den área di haf.
Yamada pa dialogá
Willem A. Cicilia di PBNO ta hasi un yamada riba tur partido konserní pa solushoná e situashon via konsulta. E organisashon ta boga pa kòmbersashonnan entre Piskabon, STINAPA, Kapitan di haf i gobièrnu pa hasi palabrashon kla pa sobrá di e temporada. “Un aserkamentu asina ta di akuerdo ku e puntonan di salida di e Roadmap Bonaire 2025-2035, kaminda diálogo, echonan i igualdat ta para sentral,” Cicilia ta bisa den su reakshon.