KRALENDIJK- Na lunda di mei, STINAPA Bonaire su Junior Rangernan a bai Klein Bonaire kaminda nan a planta 52 palu nativo komo parti di esfuersonan kontinuo pa yuda restorá e naturalesa di e isla. E aktividat tabata dirigí pa Elsmarie Beukenboom i ta parti di e trabou di STINAPA pa yuda tene Klein Bonaire saludabel i fuerte pa futuro.
E plantamentu di palu ta forma parti di STINAPA su proyekto BESTLIFE2030, un programa internashonal ku ta sostené protekshon di naturalesa i proyektonan di klima riba islanan manera Boneiru. Pa medio di e proyekto aki, STINAPA ta trahando riba restourashon di áreanan natural riba Klein Bonaire, mehorashon di maneho di bishitante, monitoriá naturalesa, i oumento di presensia di ranger riba e isla. E meta no ta solamente pa restorá naturalesa, pero tambe pa sòru pa Klein Bonaire ta bon protehá i kuidá riba término largu.
Pòtret: Stinapa
Restorá naturalesa riba Klein Boneiru ta hopi importante pasobra esaki ta un di e último áreanan di Boneiru ku no ta habitá. Tambe e tin playanan importante pa turtuga di laman traha nèshi i refnan di koral bunita rondó di e isla. Den pasado, partinan di Klein Boneiru a pèrdè gran parti di nan vegetashon natural pa motibu di aktividatnan humano i bestianan ku ta kome yerba. Plantamentu di palu nativo ta yuda trese e naturalesa bèk, ta proveé refugio pa founa, ta yuda prevení eroshon, i ta sostené refnan mas saludabel dor di redusí derame di awa den laman. Áreanan natural saludabel tambe ta mihó kapas pa manehá e impaktonan di kambio di klima i tormentonan mas fuerte.
Pòtret: Stinapa
Konekshon ku naturalesa
STINAPA ta gradisí tur e Junior Rangernan, boluntarionan, i partnernan ku a djòin e aktividat. Dor di enbolbí hóbennan den trabou práktiko di konservashon, STINAPA ta spera di yuda e siguiente generashon konstruí un konekshon mas fuerte ku naturalesa di Boneiru i komprondé dikon protekshon ta asina importante.