KRALENDIJK – Polis ta investigando diferente insidente ku a tuma lugá último dianan na Boneiru, entre otro un kiebro den un empresa, ladronisia di un skuter, hayasgo di skuternan ku probablemente ta hòrtá i un detenshon pa motibu di enkubrimentu.
Detenshon despues ku a rekonosé skuter hòrtá
Djamars 16 di yüni alrededor di 10.20 a detené un hòmber di 29 aña na Kaya Neerlandia, sospechá di enkubrimentu. E detenshon a sigui despues ku e doño legítimo a rekonosé su skuter. Investigashon di polis a mustra ku e vehíkulo tabata registrá komo hòrtá debí na un denunsia hasí anteriormente. A konfiská e skuter pa mas investigashon.
Ladronisia brutal for di ket den Belnem
Mas lat e dia ei, den kareda di 12’or, a kibra drenta den un ket na un kas den Belnem. Dos hòmber a bai di dia kla ku diferente hèrmènt di e marka Makita. E doño a kompartí imáhennan di e sospechosonan riba medionan sosial i ta hasi un yamada riba públiko pa kompartí informashon ku por yuda identifiká i lokalisá e sospechosonan.
Ladronisia di skuter na establesimentu di horeca
Riba djamars 16 di yüni a hasi tambe denunsia di ladronisia di un skuter marka Kymco Agility ku e plach’í number MF-5060. E skuter tabata stashoná riba un tereno di stashoná outo na un establesimentu di horeca na Kaminda Lac. Polis ta hasiendo un investigashon.
A topa ku vários skuter ku probablemente ta hòrtá
E mésun anochi ei sentral di polis a risibí den kareda di 18.40 un notifikashon di skuternan ku probablemente ta hòrtá na un kas bandoná na Kaya Tintorero. Na e sitio polis a topa ku tres skuter di e marka Kymco Agility sin plach’i number. E vehíkulonan tabata falta diferente piesa.
A konfiská e skuternan pa mas investigashon. Riba e tereno a enkontrá ademas un di kuater skuter ku tambe probablemente ta hòrtá. A bai ku e vehíkulo aki tambe pa mas investigashon.
Investigashon mas detayá di polis a mustra mientrastantu ku vários di e skuternan ku a enkontrá ta registrá komo hòrtá. Polis ta sigui ku e investigashon.
Kiebro den un edifisio komersial
Djarason 17 di yüni a hasi denunsia di kiebro den un edifisio komersial na Kaya Prinses Marie. Deskonosínan a kibra drenta e establesimentu i a bai ku un lèptòp, un iPad i un iPhone.
Polis ta investigando e kaso i ta purba di identifiká e sospechosonan.