KRALENDIJK – Korte Komun di Hustisia na Boneiru a imponé ayera kastigunan di prizòn di 28 i 21 aña pa dos sospechoso den e kaso di asesinato riba e bombero Sheldon J.
Korte a sentensiá W. na 28 aña di kastigu di prizòn. Segun e sentensia e tabata reponsabel pa organisá e tiroteo kaminda Sjeldon J. a pèrdè su bida. Tambe a han’é kulpabel di intento di asesinato di e amiga di e víktima i na echonan relashoná ku droga ku a sali na kla durante e investigashon.
Ko-sospechoso V.H. a haña un kastigu di prizòn di 21 aña. Korte a haña pruebá ku e tabata komplisé di asesinato di Sheldon J. No a sentensi’é pa intento di asesinato riba e amiga di e víktima i tampoko pa akusashonnan relashoná ku droga.
Tambe korte a konsedé un indemnisashon di 5.000 dòler na e amiga di e víktima pa konsekuensianan di e tiroteo. Pa eventual mas indemnisashon lo mester sigui un prosedura sivil.
Ruman muhé di Sheldon J. tambe tabata presente na e sentensia. El a biaha spesialmente pa Boneiru pa asistí na e sentensia i un amiga a apoy’é den esaki.
Apesar di e sentensia e famia ta keda atras ku sentimentunan miksto. Segun e familiarnan ningun kastigu no ta trese nan ruman hòmber bèk.
"Kon haltu e kastigunan por ta, nos ruman hòmber no ta bolbe nunka mas,” Jermel a laga sa na final.
E kaso a toka e komunidat di Saba profundamente. Pa e famia e sentensia ta nifiká un paso importante den direkshon di hustisia, pero e tristeza pa pèrdida di Sheldon J. bo ta keda sinti tur dia.
Jermel a finalisá su reakshon ku un mensahe emoshonal na su ruman hòmber defuntu: "Fly high my brother Sheldon.”