KRALENDIJK – Djamars anochi un siklista a bira víktima di un atrako armá na Kaminda Lagun. E insidente a tuma lugá den kareda di 22.25, Kuerpo Polisial Karibe Hulandes (KPCN) ta informá.
Segun polis dos hóben di aproksimadamente 17 i 18 aña a sorpresá e víktima. Un di nan lo a mustra un arma di kandela. Bou di menasa a bai ku un fatbike, un selular, un pòtmòni i un tas.
Despues di e atrako e sospechosonan a hui bai. Un sospechoso a hui na pia, mientras e otro a kore riba e baiskel hòrtá direkson pariba.
Polis a kuminsá un investigashon i ta pidi testigunan pa mèldu nan mes. Personanan ku a mira òf tende algu i tin informashon ku por kontribuí na e investigashon, por tuma kontakto ku KPCN via number di telefon 715-8000 òf anónimo via liña di tep 9310.