KRALENDIJK – Instituto Hudisial Karibe Hulandes (JICN) na Boneiru no a partisipá na e outo-evaluashon di screening di personal ku Konseho pa mantenshon di lei a pidi. Esei a sali na kla for di un rapòrt di inspekshon di e Konseho. Ademas ta pidi solisitantenan informal si nan a yega di bini den kontakto ku hustisia òf polis, mientras falta un screening formal i mas pisá.
Servisio di Institutonan Hudisial (DJI) i JICN no a yena e outo-evaluashon, apesar di diferente petishon di e Konseho. Ámbos organisashon a referí na Servisio di Reino Karibe Hulandes (RCN) komo doño di trabou formal. Pregunta di e Konseho a mustra ku JICN i DJI mes no tabatin kontakto ku RCN. E Konseho ta haña esaki lamentabel i ta mustra ku ámbos organisashon tin nan propio responsabilidat pa un bon proseso di screening.
Traha sin VOG
Un empleado nobo mester por entregá dentro di seis siman despues di entrada den servisio un deklarashon relashoná ku kondukta (VOG). Si esei no logra na tempu, un persona por kuminsá kaba den e funshon, e rapòrt ta mustra. E Konseho ta yama esaki riskante, pasobra ku esaki empleadonan por haña akseso kaba na informashon konfidensial promé ku a kompletá nan screening.
Averiguashon informal serka solisitantenan
Segun e rapòrt JCN ta hasi uso di e eskala chikí di e islanan na momento di entrevista di solisitut. Ta puntra e kandidatonan si nan a yega di bini den kontakto ku polis òf hustisia; ta pone e kontesta por eskrito. E Konseho ta krítiko riba e manera di traha aki i ta atvertí pa riesgonan riba tereno di privasidat i arbitrariedat.
Solamente personanan ku ta karga arma ta skrin di nobo periódikamente
Screening di nobo di personal ku t’ei kaba no ta tuma lugá na JICN, ku ún eksepshon: empleadonan ku ta transportá detenidonan i mester karga arma, mester pidi un VOG nobo kada sinku aña. Pa sobrá di e personal no tin kontrol periódiko. JICN mes no ta mira esaki komo un falta, tambe pasobra “eventual fayonan no ta keda anónimo” den e komunidat di eskala chikitu, segun e organisashon ta bisa den e rapòrt.
No tin screening mas pisá
Den Hulanda Europeo ta konta pa empleadonan di institushonnan hudisial un screening ámplio for di 2022 a base di datonan polisial, e VOG-P. Serka JICN na Boneiru e forma di screening aki no ta konosí. E Konseho ta haña inkomprendibel ku ta apliká e screening mas pisá aki na Hulanda si dentro di e sistema penitensiario, pero serka JICN nò.