KRALENDIJK – Despues di un promé episodio ku a hala hopi atenshon, e seri dokumental ‘Cold Cases Bonaire’ ta sigui ku su di dos episodio. Den e edishon nobo, e enfoke ta riba un di e kasonan friu mas misterioso den historia resien di Boneiru, desaparishon di e haitiano Jean Civert Monitor.
Jean a yega Boneiru pa traha na Plantashi di Fontein. Riba 30 di desèmber 2004 el a desaparesé sin laga niun rastro atras. Awor, mas ku 21 aña despues, ainda no tin klaridat tokante kiko realmente a pasa kuné. Apesar di investigashon, búskeda i diferente teoria ku a sirkulá den komunidat durante añanan, su paradero ta sigui un misterio.
E dokumental ta dal un bista profundo riba e kaso, ku testimonio di personanan ku tabata direktamente envolví òf ku a sigui e desaroyo di e investigashon djaserka.
Toyan Frans, kende tabata konosé Jean personalmente, ta konta tokante e tempu ku Jean tabata biba i traha na Plantashi di Fontein. Te awe, e no por komprondé kon un hende por disparsé sin laga niun rastro.
Tambe, periodista Boi Antoin ta kompartí su eksperensia. No solamente el a kubri e kaso komo periodista, pero el a partisipá den e búskeda ku a tuma lugá despues di e desaparishon. Segun Antoin, e kaso a laga hopi pregunta habrí ku nunka a haña un kontesta.
Finalmente, fiskal mayó, Walter Kuijpers, ta splika den kua situashon por habri un investigashon di nobo. Huntu ku esaki, e ta duna mas informashon tokante e maneho di dosié di kasonan friu i dikon e dosié di e kasonan mas bieu ya no ta na Boneiru.
Djarason benidero
E di dos episodio di ‘Cold Cases Bonaire’ ta bai den aire djárason 8 di yüli benidero. ‘Cold Cases Bonaire’ ta un produkshon di Nathaly Evertsz ku a bira posibel danki na sosten di Fonds Bijzondere Journalistieke Projecten (BJP).