KRALENDIJK – Preukupashon pa kriminalidat kresiente na Boneiru ta sigui krese. Mei mei di luna di yüni tabatin un seri di kiebro den un periodo kòrtiku. Remarkabel ta ku ta spesialmente kompanianan di konstrukshon tabata blanko di e robonan. Sospechosonan ta bai ku hèrmentnan kostoso, manera mashin di bor, mashin di sleip i otro material profeshonal.
E insidentenan resien ta sigui despues di un karta ku empresario- i habitantenan a manda huntu pa gobièrnu, polis i hustisia. Eiden a atvertí pa kriminalidat kresiente i su konsekuensianan pa seguridat, kalidat di bida i ekonomia di Boneiru. Segun e firmantenan e tantísimo kiebronan no ta pèrkurá solamente pa daño finansiero, pero tambe pa un sentimentu kresiente di inseguridat den komunidat.
Ta afektá spesialmente kompanianan di konstrukshon duru. Hèrmènt profeshonal ta representá un balor haltu i ta indispensabel pa trabounan diario. Ora ku hòrta aparatonan, proyektonan ta haña retraso i empresarionan mester invertí den material di remplaso. Banda di daño dirèkt ta bini hopi biaha gastunan mas haltu di seguro i medidanan èkstra di vigilansia aserka.
Frustrashon pa falta di feedback
Mientrastantu frustrashon ta krese bou di esnan pèrhudiká pa loke ta trata prosesamentu di denunsianan. Ta hasi denunsia despues di un kiebro, i despues polis ta indiká regularmente ku “e investigashon ta kana”. Pa hopi víktima ta keda ketu despues. Nan ta bisa ku nan ta haña tiki of niun feedback bèk tokante progreso di e investigashon òf e chèns pa haña e artíkulonan hortá bèk.
Generalmente polis ta reservá ku informashon tokante investigashonnan pendiente, entre otro pa no stroba interes di e investigashon. Pa e motibu aki hopi biaha no ta kla pa víktimanan kua stapnan ta tumando i kon leu kasonan ta aktivamente den tratamentu.
Ounke no por bisa ku sospechosonan no ta haña kastigu, ta surgi serka un parti di e empresarionan si e sentimentu ku e chèns ku ta kohe nan ta limitá. E sentimentu ei ta haña mas forsa ora ku no por haña e artíkulonan hòrtá bèk i pa un periodo largu no tin desaroyonan visibel den un kaso.
Yamada pa aserkamentu mas visibel
Den e karta ku nan a manda huntu anteriormente e empresarionan ta enfatisá ku no mester mira nan yamada komo krítika riba empleadonan polisial individual, pero komo un petishon urgente pa sigui fortifiká e kombatimentu di kriminalidat. Nan ta pidi pa mas prevenshon, koperashon mas intensivo entre gobièrnu, polis i empresarionan i un esfuerso visibel pa investigashon i mantenshon.
Empresarionan ta indiká ku hopi di nan mientrastantu mes ta invertí den vigilansia di kámara, mihó iluminashon, sistemanan di alarma i seguridat èkstra di terenonan di empresa. Sinembargo ta parse ku medidanan partikular so no ta sufisiente pa para e ola di kiebro.
E ladronisianan resien ta mustra segun e empresarionan ku kriminalidat no ta insidental mas, pero un desaroyo ku ta rekerí un aserkamentu konhunto i firme. Pasobra tanten ku empresarionan ta sinti nan obligá pa sigui protehá nan empresa mas i mas, mientras ta mas difísil pa lokalisá sospechosonan, e sentimentu di inseguridat ta sigui krese.