KRALENDIJK – Den madrugá di 20 di yüli a tuma lugá un atrako armá riba un bar na Bulevar Gobernadó N. Debrot. Polis ta investigá e kaso i ta pidi testigunan pa mèldu nan mes.
Den kareda di 10 pa 1 di madrugá sentral di polis a risibí un yamada di un atrako armá. Segun e promé resultadonan tres sospechoso a drenta e establesimentu di horeca, kompletamente bistí na pretu i ku nan kara tapá. Nan a menasá e doñonan ku un arma di kandela, mara nan i teip nan boka.
Despues e sospechosonan a hui bai ku un montante di sèn, merkansia i dokumentonan personal di e doñonan.
E investigashon preliminar di polis ta mustra ku aparentemente e sospechosonan a drenta e establesimentu for di 11’or djadumingu anochi 19 di yüli. Den kareda di kuartu pa un di madrugá nan a bandoná e bar i a hui bai den direkshon di Kaya Dialma.
Polis ta pidi un i tur ku a mira algu òf ku tin informashon di e atrako pa tuma kontakto via 715-8000 òf anónimo via e liña di tep 9310.
Polis no a publiká imáhennan di kámara. No ta konosí si tin imáhennan i si nan ta bai kompartí esaki ainda. E investigashon di e atrako armá ta tumando lugá.