Oranjestad/The Bottom/Kralendijk – Riba 10 di yüni konseho insular di Boneiru, Sint Eustatius i Saba a reuní na Sint Maarten pa e di 9 Kumbre di BES. E kumbre akí ta konkluí un siklo kompleto, loke ta nifiká ku tur e tres islanan a organisá i presedí e enkuentronan.
Durante e enkuentro, pa di promé bia a inkluí un seshon di ‘break-out’, kaminda a repartí e miembronan den tres grupo pa diskutí e tópikonan prinsipal: kuido di salú, enseñansa i representante permanente na Hulanda. Tambe a duna aktualisashon tokante WolBES/FinBES i palabrashonnan di mei 2024.
Pòtret: EPB
Den e área di kuido di salú, e énfasis tabata riba prevenshon i kombatimentu, i e retonan den e aktual struktura – inklusivo e limitashonnan riba seguro adishonal pa kuido médiko spesífiko i dental. Riba e tópiko di enseñansa, a trata konklushonnan di Konseho di Enseñansa i a traha riba proposishonnan konkreto pa mehorashon struktural, teniéndonu ku’enta e nesesidatnan lokal di kada isla.
Tokante representante permanente, a yega na konsenso riba e funshon, profil i aspektonan logístiko, i a stipulá un plan di akshon konkreto. Ademas, e konsehonan insular a ratifiká e intenshon pa eksplorá kolaborashon ku tur seis islanan den e parti karibense di Reino.
Pòtret: EPB
Enkuesta di evaluashon
Pa konkluí, a tene un enkuesta pa evaluá e efektividat di e Kumbre di BES. A pasa e presidensia di e di dos siklo pa Sint Eustatius, ku Glenville Schmidt komo presidente i Melissa Robins-Spanner komo sekretario. E siguiente Kumbre di BES lo tuma lugá riba 4 di sèptèmber 2026.