KRALENDIJK - E advertensia di lider di UPB Jolinda Craane tokante un posibel kaida fuerte di e turismo a generá pregunta serka hopi hende, pasobra e sifranan di Tourism Corporation Bonaire (TCB) pa e promé sinku luna di 2026 no ta mustra un tendensia negativo.
Craane a bisa diaweps den un komunikado di prensa distribui pa UPB ku Boneiru mester prepará su mes pa un ‘kaida serio’ di turismo. Segun Craane, e posibilidat di un bahada fuerte ta real, pasambra den e ananan tras di lomba tabatin muchu tiki invershon den e sektor. Ademas, e ta senalá entre otro e kanselashon di buelonan di JetBlue i e ta ekspresá su preokupashon riba e desaroyo di e turismo di krusero tambe. Pa e motibu ei, e ta aboga pa un reunion urgente entre e kolegio ehekutivo i e sektor turistiko.
E sifranan ofisial di Tourism Corporation Bonaire di e promé lunanan di aña un imágen diferente. Durante e periodo di yanuari te ku mei 2026, Boneiru a risibí 90.428 bishitantenan stay-over, komparando ku 89.920 den e mesun periodo un ana atras - un subida leve di 0,56 porsiento. Asina, e kresementu fuerte di mas ku 10% anual di ananan anterior no ta visibel mas, pero tampoko tin indikashon di un bahada notabel, kompará ku aña pasá. Di e sinku lunanan publiká, kuater a mustra un kresementu leve kompara ku 2025 ku tabat un aña rèkert. Solamente aprel a konosé un kaida level di 0,4 porsiento.
Pa e turismo di krusero tambe, e rapòrtnan mensual di TCB no ta mustra ningun rbahada fuerte. Ounke e kantidat por luna ta fluktua, e statistiknan publiká te asina leu, no ta sostené e tono di alarma ku ta keda usaá den e komunikado di prensa.
E deklarashonnan di Craane a generá preguntanan krítiko online. Diferente hende a puntra riba kiko su análisis ta basa, mientras otronan a senalá ku tin preokupashonnan ku ta eksistí tokante plaso largu - manera konekshonnan áereo, markadeo i e posishon kompetitivo di Boneiru - ta algu diferente di un kaida aktual ku lo ta manifestando su mes te asina leu.
Tourism Corporation Bonaire no a reakshoná públikamente riba e deklarashonnan di Craane.
Lider Politiko?
Ta notabel mas ku Craane ta firma e komunikado di prensa di djaweps komo ‘Lider Politiko di UPB’. Pa loke ta públikamente konosí, despues di e salida di e lider anterior di e partido, Craane a keda nombrá komo lider polítiko interino di e partido bèrdè. Un anunsio públiko konfirmando ku Craane a keda nombrá efinitivamente komo lider politiko te asina leu no a sali di e partido mes.