KRALENDIJK – E impase polítiko den e koalishon di UPB, MPB i e Frakshon Serberie ta keda sin solushon, mas ku un siman despues di e salida di diputado Joselito Statia. Al kontrario: e pasonan resien tantu di MPB komo di UPB ta mustra ku e partnernan di koalishon ta leu for di ta riba un linea pa ku nombramentu di un diputado nobo.
E krisis a kuminsá despues ku Statia a entregá su retiru, segun ta parse, a base di insistensia di UPB i su lider interino, Jolinda Craane. MPB mientrastantu a laga sa di ke bolbe nombre Statia komo diputado. E partido ta pone su mes riba e punto ku nan, komo partner den e koalishon aktual, mes mester sa ken nan ta proponé komo diputado.
UPB sin embargo ta parse di pensa algu diferente. E partido a pidi un reunion públiko di Konseho Insular riba 21 di yüli, ku komo punto di agènda e nombramento di un diputado nobo. Ku esaki e UPB parse di ta ku intenshon pa nombra otro kandidato, ku no ta Statia.
Ta rekerí un mayoria pa por nombra diputado nobo
Pa nombra un diputado nobo, un mayoria di e Konseho Insular ta rekeri. Esei ta nifiká ku mínimo sinku di e nuebe miembro di Konseho Insular mester a vota na fabor di e kandidato ku UPB lo ke presentá.
Hustamente einan ta e insertidumbre polítiko na momentu aki. Si MPB ta keda para tras di su mes kandidato i e partidonan no yega nan un akuerdo promé ku e momentu di votashon, UPB no sin ams tin e kantidat di voto ku nan mester pa por nombra nan ‘propio’ diputado. Obvio ta ku e posishon ku Frakshon Serberie lo asumí ta importante den esaki.
Si MPB ta vota kontra un kandidato alternativo, UPB lo mester busk’e apòyo di e aktual oposhon. Den prátika esei ta nifiká ku mínimo un di e dos frakshonnan ku un solo miembro – M21 i/òf Vrolijk – lo mester ta dispuesto pa apoyá e nombramentu aki. Si tin sufisiente apoyo polítiko pa esaki, ainda ta deskonosí.
Sin klaridat
Pa motibu di e echo ku reunion di Konseho Insular a keda pidí pa dia 21 di yüli, lo bai dura por lo ménos 9 dia mas, promé ku lo tin klaridat kiko eksaktamente ta bai pasa den Konseho Insular i -konsekuentemente- den kolegio ehekutivo.
Entretanto e trabounan di e kolegio Ehekutivo ta wórdu hasí pa e dos diputadonan ku a keda. For di e UPB ta dunando e impreshon ku gobernashon ta kontinuá manera nada no pasa. Opservadornan polítiko sinembargo ta hañá e ponensia aki unu ku ta inkorekto, pasombra ta aktuando komo sifuera no tin un krisis den koalishon, pero esaki debidamente ta e kaso. No tin klaridat si e gobièrnu di e isla aki na e momentunan aki ta konta ku mayoria òf no.