KRALENDIJK – Ta parse ku e impase polítiko na Boneiru a intensifiká mas. Djaluna partnernan di koalishon UPB i MPB a bombardeá otro di nobo ku kartanan yen di akusashon, mientras ku ainda no ta kla kon e kolegio ehekutivo di e isla lo bira despues di baimentu di diputado Joselito Statia ku MPB a nombra.
MPB ta mustra ku for di 6 di yüli UPB ta dispone di e nombramentu nobo di Statia komo diputado na nòmber di MPB, pero segun MPB e partido bèrdè nunka a reakshoná supstansialmente. Segun e presidente di frakshon pa MPB Hennyson Thielman esei ta un indikashon ku UPB no ta konta mas riba sosten di su partido. El a mustra riba e petishon di UPB pa tene un reunion públiko di konseho insular pa kandidatura di un propio diputado nobo. Thielman a bai asta asina leu di felisitá UPB ku un supuesto formashon di un koalishon nobo.
UPB no a laga warda hopi riba su reakshon. Den un karta e mésun dia, firmá pa e frakshon di UPB di tres kabes, e partido ta akusá MPB ku e ta evitá pa ‘tres luna kaba’ un konsulta direkto entre partnernan di koalishon. “Kiko ta stroba boso pa kohe e telefon, of manda un mensahe Whatsapp ku un petishon pa topa otro?”, UPB ta skirbi.
Mientrastantu rumornan di posibel kombinashonnan nobo di koalishon ta keda pèrsisití. Diferente media a notifiká e último dianan ku UPB lo ke sigui goberná ku frakshon di Salma Serberie ku sosten di M21. Djaluna anochi e mesun fuentenan ei sinembargo a notofiká ku M21 lo no ta disponibel pa esei. Tambe Serberie no ta sinti muchu pa kontinuá ku koperashon di solamente UPB bou di e aktual sirkumstansianan.
Si esei ta korekto, ta keda UPB por lo pronto solamente sosten di su propio tres asientonan, mientras pa nombramentu di un diputado nobo mester di un mayoria di sinku voto den e konseho insular di nuebe kabes.
Krítika ta krese na Boneiru
Ounke ta parse ku e pelea kontínuo entre e partnernan di koalishon ta hasi daño na tur partido polítiko, ta resoná riba kaya spesialmente krítika riba aktitut di UPB, ku oponentenan i un parti di opinion públiko ta deskribí komo arogante. No ta sigur si e reunion públiko di konseho insular ku a pidi pa 21 di yüli ta sigui realmente; tanten ku UPB no tin un mayoria di sinku voto su tras, un nombramentu eksitoso di un diputado nobo di antemano no ta garantisá.