KRALENDIJK – Korespondensia ku propio partnernan di koalishon a bira mientrastantu rutina diario serka Union Patriotiko Boneriano (UPB). Despues di dos karta ayera, e frakshon kompleto di e partido a disidí di bolbe skirbi un karta.
Den e karta di djamars UPB ta reprochá kompañeronan di koalishon MPB i frakshon Serberie. Nan lo ta hui lunanan kaba un kòmbersashon tokante supuesto problemanan ku funshonamentu di diputado Joselito Statia. Statia a baha fin di yüni komo diputado, despues ku a surgi deskòrdia tokante su funshonamentu.
"Aki a sali na kla ku MPB tabatin un agènda dòbel i tabata usa UPB solamente bou di e preteksto di koalishon,” segun UPB den e karta.
"UPB lo no sigui pèrmití ku un otro frakshon ta usa UPB komo buriku di karga,” e partido ta sigui skirbi den e karta.
Sinembargo ta pidi sosten
Apesar di e akusashonnan amargo di último dianan UPB ta hasi un yamada den e mésun karta na e dos partnernan di koalishon pa sostené nombramentu di un diputado nobo. E nombramentu ta riba agènda di un reunion públiko di konseho insular riba 21 di yüli 2026.