KRALENDIJK – Durante su reunion di 22 di yüli 2026, Kolegio Ehekutivo a stipulá e repartishon di kartera entre e diputadonan. Ku e desishon akí, e responsabilidatnan den Kolegio Ehekutivo a keda repartí formalmente.
Diputado Jennifer Mohamedjoenoes lo guia Direktorado di Maneho i Sosten, komo tambe Direktorado di Supervishon i Mantenshon di Lei. Su kartera ta inkluí finansa di gobièrnu i impuesto, asuntunan intergubernamental i regional, ekonomia, empresariado i turismo sostenibel, diáspora i remigrashon, ademas di bien inmóbil i bibienda.
Diputado Timoteo Silberie lo guia Direktorado di Komunidat i Kuido. E ta responsabel pa e áreanan di edukashon i alohamentu di enseñansa, deporte i rekreashon, arte i kultura, i salubridat públiko.
Diputado Dennis Martinus, na su turno, lo guia Direktorado di Planifikashon i Desaroyo. Su responsabilidatnan ta kubri bienestar di animal, ordenamentu teritorial, planifikashon i prosperidat, infrastruktura i maneho di awa, asuntunan agríkola, piskamentu i siguridat alimentario, komo tambe naturalesa, medio ambiente i rekuperashon ekológiko.
Gezaghèber Soliano ta presidente di Konseho Insular, presidente di Kolegio Ehekutivo i presidente di Reunion General di Akshonista. E ta responsabel pa bon gobernashon, órden públiko i siguridat, maneho di krísis i kombatimentu di kalamidat.
Remplaso den kaso di ousensia
Tambe a stipulá un areglo pa remplaso den kaso ku un di e mandatarionan ta ousente. Diputado Dennis Martinus lo remplasá diputado Jennifer Mohamedjoenoes, diputado Jennifer Mohamedjoenoes lo remplasá diputado Timoteo Silberie, miéntras diputado Timoteo Silberie lo remplasá diputado Dennis Martinus.