KRALENDIJK- Despues di e instalashon di señor Dennis Martinus komo diputado nobo na nòmber di MPB den Kolegio Ehekutivo di Boneiru, un entrega di tareanan i dosiénan dor di ex-diputado Joselito Statia a tuma lugá na un manera ordená.
Statia a repasá ku señor Martinus e tareanan relashoná ku e dosiénan aktual i e estado di asuntunan denter di su portfolio anterior, pa asina garantisá e kontinuidat di gobernashon. Statia a indiká klaramente ku e ta dispuesto pa sostené e diputado nobo ku konseho i apoyo den e periodo binidero.
Segun un komunikado di parti di diputado Martinus, esaki lo kontinuá, den e spíritu di gobernashon konfiabel i responsabel, denter di e kuadro stipulá pa e koalishon UPB/MPB/Frakshon Serberie manera indiká den e Mini-Programa di Gobernashon "Ordená | Stabilisá | Avansá" pa e periodo 2026–2027. E programa aki ta pone énfasis riba un gobernashon realístiko i faktibel pa e mandato ku ta resta te na e elekshon di Konseho Insular na mart 2027, ku prioridat riba finansas na òrdu, infrastruktura, maneho di shushi, prosperidat amplio, otorgamentu di pèrmit i mantenshon di lei, òrdu públiko i seguridat, i bon gobernashon.
Kolegial
Diputado Martinus ta enfatisá ku e tareanan aki ta wòrdu karga di forma kolegial i ku e diputadonannan, huntu ku gezaghèber lo dediká nan mes huntu pa, denter di e periodo limitá di gobernashon ku ta resta, ‘trese struktura, rekonstruí konfiansa i tuma akshon konkreto riba e asuntunan urgente ku komunidat di Boneiru ta konfrontá’.