KRALENDIJK – UPB a retirá su konfiansa di forma inmediato ku partner di koalishon MPB. Asina e koalishon di gobièrnu di UPB, MPB i frakshon Serberie di apénas kuater luna ta pèrdè su mayoria den Konseho Insular.
Presidente di frakshon di UPB Benito Dirksz a anunsiá e desishon djaweps den un karta na gezaghebber interino Jeaninne Wong Loi Sing. E karta ta mandá tambe na nòmber di konsehalnan di UPB Pablo James Kroon i Simeona Chirino-Felida.
Segun UPB falta e base di konfiansa nesesario pa kontinuá e koperashon polítiko ku MPB. P’esei e partido ta hala su sosten na MPB komo partner di koalishon di inmediato aden.
E koalishon tabata konsistí di UPB ku tres asiento, MPB ku un asiento i e miembro independiente di Konseho Insular Salma Serberie. Huntu nan tabatin e mayoria mas chikitu posibel di sinku di e nuebe asientonan. Sin MPB UPB i Serberie ta sobra kuater asiento.
E tres partidonan a forma na komienso di aprel un Kolegio Ehekutivo nobo. Jennifer Mohamedjoenoes a bira diputado na nòmber di UPB, Joselito Statia na nòmber di MPB i Timoteo Silberie na nòmber di frakshon Serberie.
Konflikto tokante nombramentunan
Tabatin frikshon den koalishon kaba pa basta tempu. MPB i frakshon Serberie a oponé e siman aki kontra diferente proposishon di UPB. Tabata trata entre otro di un nombramentu sin prosedura di solisitut públiko, un funshon pa un anterior funshonario di gobièrnu i oumento di salario pa empleado- i diputadonan.
Segun e dos partnernan di koalishon e dos proposishonnan aki no tabata pas den e palabrashonnan di atministrashon íntegro. Den su karta UPB no ta bisa dikon e konflikto a kondusí awor na un kiebro definitivo.
E partido ke un kòmbersashon mas lihé ku ta posibel ku Wong Loi Sing pa aklará ku mas detaye su punto di bista i e situashon polítiko ku a surgi. A manda un kopia di e karta pa Konseho Insular, frakshon Serberie i MPB.
Diputadonan ta keda sinta por lo pronto
Retiro di e koperashon polítiko no ta nifiká outomátikamente ku e diputadonan no ta den funshon mas. Boneiru no konosé hurídikamente un státus demishonario manera na Hulanda. Diputadonan ta keda sinta te ora nan mes tuma retiro òf si Konseho Insular retirá nan.
P’esei Konseho Insular mester determiná kon e ta sigui ku e aktual Konseho Ehekutivo. Pa un koalishon mayoritario nobo mester di minimal sinku asiento.
E kiebro ta nifiká e siguiente krísis gubernamental na Boneiru. E anterior koalishon a pèrdè komienso di e aña aki su mayoria despues ku Serberie a bandoná frakshon di PDB. Despues di lunanan di negosashon e aktual Konseho Ehekutivo a tuma poseshon dia 2 di aprel, lokual mester a restablesé trankilidat atministrativo i stabilidat finansiero. Kuater luna despues e mayoria ei tambe a plama for di otro.