KRALENDIJK – Frakshon di M21 den Konseho Insular ta distansiá su mes enfátikamente di e karta ku frakshon di UPB a manda, entre otro, na Tweede Kamer i Raad van State, a konsekuensia di e preokupashonnan ku sekretario di estado di Asuntunan Interno i Relashonnan di Reino a ekspresá tokante e situashon polítiko na Boneiru. Segun lider di frakshon di M21 Désirée Coffie, no por konsiderá e aktua di sekretario di estado simplemente komo un interferensia no permití den autonomia lokal.
Den un karta dirigí na presidente di Konseho Insular, Coffie ta skibi ku M21 ta distansiá su mes di “e kontenido, tono i konklushonnan” di e karta di UPB. Segun Coffie, den e relashonnan konstitushonal, gobièrnu hulandes tin un responsabilidat pa, entre otro, bon gobernashon, integridat i estado di derecho.
P’esei M21 ta konsiderá hustifiká pa investigá seriamente señalnan di inestabilidat polítiko, kuestionnan di integridat i posibel influensia polítiko riba aparato ambtenarial. “Autonomia i supervishon den e sistema konstitushonal no ta kontradikshonnan, sino nan ta komplementá otro,” segun e frakshon.
Na mes momento Coffie ta atvertí pa no hasi akusashonnan kontra institushonnan hulandes sin sufisiente base faktual. Segun M21, esaki por debilitá konfiansa den institushonnan públiko ainda mas i hasi kolaborashon entre Boneiru i Reino mas difísil. Segun e partido, diferensianan di opinion polítiko “no mester wordu elevá na konfliktonan staatkundig”.
M21, al kontrario, ta ekspresá konfiansa den e papel konstitushonal di e instansianan di Reino envolví i ta sostené un tratamentu transparente i kuidadoso di e preokupashonnan ku sekretario di estado a trese dilanti. E frakshon ta enfatisá tambe e importansia di un aparato ambtenarial profeshonal i independiente ku por funshoná sin preshon polítiko.
UPB no por papia na nòmber di Konseho Insular
Finalmente Coffie ta pone di forma kla ku, segun M21, e karta di UPB ta representá solamente un punto di bista polítiko di UPB. “P’esei no por konsiderá ku frakshon di UPB ta papia na nòmber di Konseho Insular, ni na nòmber di Entidat Públiko Boneiru.” Segun M21, Konseho Insular no a tuma ningun desishon tokante e relashon gubernamental ku Reino.
P’esei M21 ta di opinion ku promé ku saka konklushonnan mas amplio na nòmber di Boneiru, mester debatí e tipo di asuntunan akí públikamente den Konseho Insular.