KRALENDIJK – Tourism Corporation Bonaire (TCB) resientemente a risibí un grupo di profeshonalnan di biahe for di Merka i Canada pa un biahe di familiarisashon. Meta tabata pa laga e partisipantenan eksperensiá personalmente e diferente aspektonan di Boneiru komo destinashon turístiko.
E grupo a keda na Boneiru di 21 te ku 26 di sèptèmber, den kuadro di Bonaire Tourism Summit 2026. Durante nan estadia nan a bishitá diferente parti di isla, inkluso e área di salu na zùit, Pekelmeer, Willemstoren, 1000 Steps, Gotomeer i Rincon.
Pòtret: TCB Parti importante di e programa tabata bishita na diferente hotel i resort, kaminda e profeshonalnan a topa ku representantenan di e sektor i a haña informashon tokante e oferta pa bishitantenan. Tambe nan a eksperensiá diferente restorant i aktividat turístiko.
Durante e ‘Flash Flamingle Business Speed-Date Edition’ na restorant Biña, e partisipantenan a tene enkuentronan kòrtiku ku empresarionan lokal den sektor turístiko. Esaki a duna e dos bandanan oportunidat pa interkambiá informashon i eksplorá posibilidatnan pa kolaborashon.
E programa a inkluí tambe un biahe ku katamaran pa Boneiru i Klein Bonaire, kombiná ku snòrkelmentu, landamentu i un sena riba laman. Ademas, e profeshonalnan a partisipá den Bonaire Tourism Summit, ku e aña akí tabatin komo tema ‘Everything Is Connected – Tur kos ta konektá ku otro’.
Mihó idea kiko Boneiru ta representá
Segun direktor di TCB Elesiër Angel, bishitanan di e tipo akí ta duna profeshonalnan di biahe un mihó idea di loke Boneiru tin di ofresé ku un presentashon so. E intenshon ta pa nan por rekomendá Boneiru na nan klientenan a base di nan propio eksperensia.
TCB a gradisí e empresanan i organisashonnan lokal ku a kontribuí na e programa i ta spera ku e kontaktonan ku profeshonalnan di biahe na Nortamérika por sigui fortifiká.