THE BOTTOM, Saba – Reakshonando riba e atenshon kresiente pa ophetonan kultural ku durante e periodo kolonial a wordu entregá sin boluntat òf robá, e ministernan di e Konsulto Ministerial di e 4 paisnan den Reino a desidí instalá un grupo di trabou pa kolekshonnan den un konteksto kolonial. E meta ta ku museonan i institushonan di patrimonio den e Karibe haya mas bos den e maneho di e kolekshonnan aki, basá riba un asociashon igualitario.
E grupo di trabou a tene su promé reunion físiko na Saba, na e Saba Heritage Center i e Eugenius Johnson Center. E sesionnan tabata enfoká riba e konturnan i prioridatnan pa e konsehо ku lo wòrdu presentá na e Ministerial na novèmber 2026. Topiko manera maneho di kolekshon, digitalisashon, profesionalisashon, infrastruktura konsiente di klimá i komparto di konosementu tabata sentral.
Komo e isla mas chikitu den e Reino, Saba tabata un dekòr apropiá pa e promé reunion aki. E programa tabata inkluí, entre otro kosnan, un tour guiá pa lugarnan histórikonan na The Bottom, guiá dor di e antròpolog i investigadó Sabeño Dimetri Whitfield, i un bishita na e dos museo di e isla.
Struktura nobo
Pa e trayekto aki, deliberadamente a skohé pa un struktura nobo, den kual tanto funshonarionan di e gobièrnonan komo ekspertonan di patrimonio i museo for di e Karibe i e parti Europeo di Hulanda ta kolaborá. E ministerio di Edukashon, Kultura i Siensia a duna buró di konseheria Scriptis, bou lideransa di Ludmila Duncan, e enkargo pa akompaña e grupo di trabou den e elaborashon di e rekomendashonnan tokante e devushon di obhetonan kultural i e maneho di kolekshonnan di museo.