KRALENDIJK – Èks diputado i habitante di Boneiru Nina den Heyer a dirigí un karta pa e miembronan di Tweede kamer, reakshonando riba e subida drástiko den tarifanan di koriente na Boneiru. Den Heyer, ku tin un ret amplio tantu na Boneiru komo na Hulanda, ta argumentá ku e subida di tarifa ta trese na kla un problema muchu mas profundo ku solamente kostanan di energia ku ta subi.
Segun Den Heyer, e subida di kasi 30 porshento den e preis variabel di elektrisidat ta demonstrá ku e igualdat primentí entre Hulanda Europeo i Hulanda Karibense ta faya den prátika. E ta argumentá ku habitante di Boneiru ta keda afektá desproporshonalmente pa desaroyonan internashonal, mientras ku protekshon di poder atkisitivo i seguridat ekonómiko na Hulanda Europeo ta haltu riba agènda polítiko.
Tension geopolítiko
Den Heyer ta rekonsé ku Kompania di Awa i Koriente (WEB) a splika ku e subida di tarifa ta mayormente resultado di desaroyonan internashonal den e merkado di energia, inkluyendo e tenshonnan geopolítiko entre Estadonan Uní i Irán. E por komprondé e splikashon aki, pero ta señalá ku esaki na mes momento ta mustra kon vulnerabel Boneiru ta pa desaroyonan eksterno.
Den su karta, e ta señalá tambe ku diskushonnan tokante transishon di energia, sostenibeldat i redukshon di dependensia riba kombustibel fósil ta sigui pa hopi aña kaba. Den Heyer pesei ta argumentá ku ta husto di puntra si e desishonnan i invershonnan ku a hasi, bèrdèderamente a resultá den e resiliensia ku residentenan di Boneiru tin mag di spera.
Mientras kue ta ekspresá apresio pa e redukshon di e tarifa fího danki na finansiamentu adishonal Hulandes, e ta enfatisá mesora ku kompensashon ad hoc no ta ofresé un solushon struktural. Segun Den Heyer, e pregunta fundamental ta keda dikon residente di Boneiru ta eksponé desproporshonalmente na fluktuashon di preisnan internashonal.
Preguntanan parlamentario
Den Heyer ta hasi un komparashon ku Hulanda Europeo. E ta argumentá ku un subida komparabel den preis pa koriente kasi sigur lo a resultá mesora den pregunta den parlamentario, debatenan polítiko i medidanan pa protehá e siudadano. “Na Boneiru esaki ta keda presentá prinsipalmente komo un realidat ekonómiko inevitabel”, asina Den Heyer ta bisa den su karta.
Den su yamada riba Tweede Kamer, Den Heyer ta pidi pa no trata e subida di tarifa komo un insidente lokal, sino komo un señal ku e vulnerabilidat struktural di Hulanda Karibense ainda keda no a keda tratá sufishentemente. E ta hasi un apelashon riba Parlamento pa reflekshoná riba e protekshon ku residentenan di Boneiru tin derecho riba dje i den ki forma transishon di energia por kontribuí bèrdadaderamente na mas trankilidat i independensia, i -na promé lugá- na un igualdat real dentro den Reino.
E mesun nivel di atenshon?
Segun Den Heyer, e diskushon no ta solamente tokante preis di koriente, sino tokante siudadanonan hulandes, sea nan ta biba na Den Haag, Ameland òf Boneiru, por konta riba e mesun nivel di atenshon, protekshon i responsabilidat polítiko. E pregunta ei, Den Heyer ta konkluí su karta, ta meresé un kontesta.