THE BOTTOM - Na su despedida komo gezaghèber di Saba, Jonathan Johnson a risibí un Kondekorashon Real pa su gran trabou pa e isla. El a risibí e homenahe aki for di mannan di Eric van der Burg, e sekretario di estado di Relashonnan den Reino. A nombra Jonathan Johnson komo ‘Ridder In de Orde van Oranje-Nassau’.
Eric van der Burg a elogiá e dedikashon, integridat i kapasidat pa konektá ku kua Johnson a kumpli den su funshon. Johnson a hasi esaki den un komunidat kaminda tareanan atministrativo ta direktamente palpabel den bida diario di e habitantenan. Banda di esaki el a para fuerte pa bon gobernashon, koheshon sosial i fortifikashon di e posishon di e isla denter di Reino i e region. Su trabou tabatin un impakto riba stabilidat, desaroyo i representashon di Saba. Tantu lokal komo den kolaborashon ku partnernan denter di Hulanda Karibense i Hulanda Oropeo.
Pòtret: EPS
Den su disertashon sekretario di estado a menshoná kambionan grandi ku Saba a pasa aden bou di liderazgo di señor Johnson. Entre otro e reforma konstitushonal di 10-10-10, pero tambe realisashon di un haf nobo. Tambe el a para ketu na e susesonan ku tabatin impakto grandi riba komunidat manera Covid i orkannan Irma i Maria. Tambe Johnson a kosesha hopi apresio pa e echo ku semper e tabata aksesibel pa tur hende, su aktuashonnan firme durante di krísis i su komunikashon personal ku e habitantenan di Saba.
Johnson for di 2008 tabata gezaghèber di Entidat Públiko Saba. Den e funshon aki e tabata responsabel pa entre otro órden públiko i seguridat, maneho di krísis, kalidat di atministrashon públiko i e representashon di Saba denter di Reino Hulandes.