ORANJESTAD, St. Eustatius – Di 8 pa 12 di yüni 2026, miembronan di e grupo di trabou No Mas No More (NMNM) a reuní na Sint Maarten i Sint Eustatius pa nan konferensia di trabou anual. E konferensia a trese huntu representantenan di Aruba, Boneiru, Kòrsou, Saba, Sint Eustatius, Sint Maarten, i e ministerionan hulandes di Salubridat, Bienestar i Deporte (VWS), Enseñansa, Kultura i Siensia (OCW), i Hustisia i Seguridat (JenV). E meta tabata pa fortifiká e kolaborashon den kombatimentu di violensia doméstiko i maltrato di mucha.
Durante di e siman, e partisipantenan a profundisá riba tópikonan manera futuro ratifikashon i implementashon di e Tratado di Istanbul òrdu di prohibishon temporal, koperashon entre islanan pa sosten di víktima i detekshon trempan di faktornan di riesgo relashoná ku violensia basá riba género. Ademas, e partisipantenan a traha riba akuerdo pa un sistema komun pa kolektá dato riba tur isla na un mihó manera.
E partisipantenan a bishitá vários organisashon na Sint Maarten i Sint Eustatius. Nan a bishitá organisashonnan lokal manera shèlter di hende muhé, Servisio di Sosten pa Víktima i Voogdijraad, pa sa mas tokante inisiativanan lokal. Tambe tabatin un interkambio spesial entre e grupo di trabou di NMNM i e Grupo di Konsulta Multidisiplinario (MDO) di Sint Eustatius, kaminda ku nan a haña bista riba kon organisashonnan lokal ta kolaborá i kordiná kasonan.
Pa Carmen Grefte (Presidente di NMNM) i Ereina Hunt-Gorden (representante di Sint Eustatius), e konferensia a enfatisá e importansia di kolaborashon entre profeshonalnan pa krea un aserkamentu den henter Reino kontra violensia doméstiko i maltrato di mucha.
Grupo di trabou di Reino
No Mas No More ta un grupo di trabou di Reino ku ta promové kolaborashon entre e seis islanan den Karibe i Hulanda pa prevení i atendé ku violensia doméstiko i maltrato di mucha.