KRALENDIJK- Den kuadro di nan di 25 aniversario e kompania Linkels & Partners ta organisá riba djaweps 18 i djabièrnè 19 di yüni 2026 un kantidat di tayer gratis na Boneiru. E enkuentronan lo tuma lugá na Delfins Beach Resort i ta dirigi riba teman aktual pa empresario, hefenan i profeshonalnan di rekurso humano.
Riba e programa tin entre otro tayernan tokante mehorashon di cashflow, prinsipionan básiko di maneho di krísis, retenshon di trahadónan den un merkado di trabou apretá i puntonan di atenshon den kaso di retiru di trahadónan.
Segun Harald Linkels, e tayernan ta un manera pa duna algu bèk na kliente i komunidat en general. "Durante e último 25 añadan, hopi organisashon i profeshonal a pone nan konfiansa den nos. Ku e tayernan aki nos kier parti algu di nos konosimentu i kontribui di un manera práktiko na desaroyo di organisashonnan na Boneiru."
Un seri komparabel di tayer ku a wòrdu organisá na St. Maarten den luna di mei a hala hopi hende.
Hopi interes
E interes pa e edishon di Boneiru ta tambe grandi. "Ya kaba tur e tayernan ta kasi yen" segun hefe di merkadeo Carine Thielman. "Personanan ku kier partisipá, mester registrá nan mes mas lihé posibel pa wak si nos por duna nan un lugá ainda. Pasobra e tayernan ta hopi interaktivo, nos por akapará no mas ku 15 den kada grupo."
Registrashon por tuma lugá via di e wepsait di Linkels & Partners.