KRALENDIJK– Tourism Corporation Bonaire (TCB) e aña aki ta selebrá su di 35 aniversario, i asina ta marka mas ku tres dékada di dedikashon sosteniendo desaroyo duradero di turismo na Boneiru.
For di su lantamentu na aña 1991, TCB a traha estrechamente huntu ku gobièrnu, sektor privá, organisashonnan sosial i partnernan lokal i internashonal pa yuda posishoná Boneiru komo un di e destinashon mas apresiá den área karibense.
Durante e añanan, e sektor turístiko di Boneiru a konosé un desaroyo signifikante ku mas bishitante, mihó konekshonnan internashonal, un oferta turístiko mas amplio i rekonosementu mundial pa su ambiente marino, posibilidatnan pa buseo i su kompromiso ku konservashon di naturalesa. Segun TCB, e progreso akí ta resultado di e esfuersonan konhunto di henter komunidat.
Maneho di destinashon
Den e añanan TCB tambe a krese di un organisashon di merkadeo di destinashon pa un organisashon di maneho di destinashon ku ta enfoká riba planifikashon stratégiko, sostenibilidat, desaroyo di produkto, konekshonnan aéreo i krusero, investigashon i kolaborashon ku un amplio ret di partnernan lokal i internashonal.