KRALENDIJK – Aktualmente Tourism Corporation Bonaire (TCB) ta kondusiendo su investigashon di disponibilidat di kamber di kada dos aña pa aktualisá e datonan di akomodashon na Boneiru i pa akumulá konosementu balioso tokante e sektor di turismo na nos isla.
E investigashon ta yuda TCB pa haña un mihó bista di kapasidat di akomodashon, kresementu di merkado, tendensianan di okupashon, loke e bishitantenan ta gasta, patronchinan di biahamentu i e prestashonnan en general di e sektor. E konosementu akí ta di importansia esensial pa investigashon, planifikashon stratégiko, desaroyo di turismo sostenibel i toma di desishon bon balansá ku bista riba futuro di Boneiru.
TCB ta invitá tur operadó di hotèl, doño di bien inmóbil, mènedjer i stakeholder den e sektor di akomodashon pa partisipá pa medio di suministrá informashon konfidensial tokante disponibilidat di kamber, tendensia di okupashon, kresementu i prestashon den pasado.
“E investigashon akí ta esensial pa por sòru pa datonan konfiabel di turismo ku ta sostené planifikashon stratégiko i kresementu sostenibel keda aktual”, segun Elesiër Angel, direktor di TCB. “E konosementu ku nos optené lo yuda nos identifiká tendensianan, fortifiká planifikashon di turismo, sostené desaroyo di produkto i mehorá e eksperensia en general di bishitante, miéntras nos ta sòru ku futuro desishonnan ta basá riba datonan eksakto.”
E konklushonnan di e investigashon lo ta un sosten tambe pa e aktividatnan di merkadeo i investigashon di TCB, i pa desaroyo mas aleu di produktonan i servisionan turístiko.
Pa mas informashon òf pa partisipá, por fabor tuma kontakto ku TCB via marketing@bonaireisland.com.