KRALENDIJK – E barku krusero Renaissance tin un salida programá for di Boneiru riba 26 di dezèmber pa un biahe di 14 dia i 13 anochi dor di Karibe. Segun Corendon, ta trata di un salida pa un biaha so, ku ta permití pasaheronan subi na Boneiru.
E itinerario anunsiá ta inkluí Guadeloupe, Tortola, Saint Kitts i Nevis, Martinique, Barbados, Saint Vincent i e Grenadines, Dominica, Aruba i Kòrsou.
Renaissance a nabegá anteriormente bou di nòmber Maasdam pa Holland America Line. Segun e informashon di Corendon, e barku a pasa dor di un renovashon kompletu na 2025 i tin kapasidat pa un máksimo di 1.200 pasahero. E fasilidatnan ta inkluí restorant, piscina, bar, un teatro i espasionan pa wellness i fitness.
Durante e biahe lo tin personal ku ta papia hulandes i ingles. Corendon tambe lo tin un punto di servisio a bordo pa preguntanan i asistensia na pasaheronan.
E operashon di Renaissance ta un kolaborashon entre Corendon, e kompania britániko Ambassador Cruise Line i e kompania franses Compagnie Française de Croisières.