KRALENDIJK – James Finies lo lansa ofisialmente Partido Pueblo Progresivo (PPP) awe, Dia di Boneiru. E partido nobo ta presentá su mes komo un movimiento polítiko inklusivo bou di e lema ‘Kada Habitante Promé’.
Durante e lansamentu, PPP lo presentá un manifesto preliminar ku ta enfoká, entre otro, riba kosto di bida, kas i hür pagabel, awa i elektrisidat, kuido di salú, enseñansa, empleo, oportunidatnan pa hóbennan, sosten pa grandinan, bon gobernashon i desaroyo ekonómiko sostenibel.
Parti di e programa ta un eksposishon tokante e 1.165 dianan ku Finies a pasa den komunidat internashonal pa pidi atenshon pa e situashon konstitushonal di Boneiru. E eksposishon lo inkluí potrètnan i dokumentonan relashoná ku su aktividatnan na diferente fòrumnan regional i internashonal, inkluyendo Nashonan Uni. Finies ta boga pa Boneiru wordu inkluí riba e lista di Nashonan Uni di teritorionan no outónomo.
E lansamentu ta tuma lugá pa 6’or di atardi na Kaya Libertador Simón Bolívar 26. E evento ta habrí pa públiko.