DEN HAAG- Gabinete hulandes ta proponé pa oumentá e kompensashon di kilometer liber di impuesto i baha temporalmente e akseins riba gasolin na Boneiru, Sint Eustatius i Saba.
E dos medidanan ta parti di e Plan di Impuesto 2027, ku a wordu presentá na Tweede Kamer riba Prinsjesdag, 15 di sèptèmber. Tweede Kamer i Eerste Kamer ainda mester aprobá e proposishonnan.
E kompensashon máksimo di kilometer liber di impuesto lo subi di 0,20 pa 0,22 dòler pa kilometer. E oumento ta apliká tambe na sierto gastunan di outo i gastunan ekstraordinario, i lo tin forsa retroaktivo for di 1 di yanüari 2026. Dunadónan di trabou por paga nan personal e kompensashon mas haltu sin impuesto, pero no ta obligá pa hasi esaki.
Bahada tempora di akseins
Ademas, gabinete ke baha e akseins riba gasolin durante henter aña 2027 pa aliviá e efekto di preisnan haltu di kombustibel. Na Boneiru, e rebaha proponé ta 5,5 sèn di dòler pa liter, mientras na Sint Eustatius i Saba e ta 4,19 sèn pa liter. Si parlamento aprobá e medida, e rebaha lo ta na vigor di 1 di yanüari te ku 31 di desèmber 2027.