H’ei trahadó, konosé bo derecho
Skirbí pa: Norwin Nòchi Willem, konsehero USIBO
KRALENDIJK - Djamars 22 di sèptèmber ta otro fecha importante den desaroyo di nos mundu sindikal aki na Boneiru. For di lantamentu di USIBO, un di e puntonan di lanse di sindikalismo tabata i ta te ainda pa hiba sindikalismo na Boneiru na un nivel mas haltu.
E meta, e vishon i e direkshon ku a skohe ta DI BOLUNTARISMO PA PROFESHONALISMO. Esaki ta un eskoho konsiente, pasobra ta solamente ku un sindikalismo fuerte i profeshonal, e balansa di poder entre kapital i labor por ta unu hustu. Ta solamente ku un sindikalismo fuerte i bon organisá por influenshá gobièrnu pa traha lei- i reglanan ku ta protehá e trahadó su seguridat i salú riba flur di trabou. Ta ku un sindikalismo fuerte i bon organisá por sinta na mesa di negosashon ku dunadónan di trabou a base di partnership igual i ku rèspèt i rekonosementu yega na akuerdonan di kondishonnan laboral ku ta yuda den alsa kalidat di bida di e trahadó i su famia i ku ta respetá e dignidat di trahadó i su famia. Ta ku un sindikalismo fuerte i bon organisá nos por duna kontenido real na e prinsipio di igualdat i bisa nò na deskriminashon i nò na desigualdat riba flur di trabou. Ta ku un sindikalismo fuerte i bon organisá ta skucha e bos di e klase trahadó i nos ta gana e rèspèt i rekonosementu den komunidat kompleto.
Un di e aktividatnan pa logra alsa e nivel di sindikalismo ta formashon di e wes’i lomba di e sindikato. Sindikato su forsa no ta di ariba bai abou, esta di direktiva bai miembresia. Forsa di sindikalismo ta den e konsiensia di e klase trahadó pa organisá i uni su mes masalmente den un sindikato. Tanten ku e trahadó keda biba den e mundo di individualismo, kere ku e so por solushoná tur kos, e ta tira afó su propio protekshon, su propio oportunidat pa partisipá den desaroyo di su isla i asina yuda determiná i fiha rumbo. Ademas e ta bira sumamente vulnerabel pa abuso, eksplotashon i tur sorto di maltrato riba flur di trabou, pasobra e ta su so i sin defensa. E otro forsa importante di sindkalismo ta su shòpstewardnan.
Shòpstewardnan tin un funshon i un responsabilidat sumamente importante i krusial den e forsa ku e sindikato por desaroyá komo representante di e trahadó den e kompania, den e empresa òf den e instituto. Shòpsteward ta e wowo i orea na trabou tantu pa e koleganan trahadó, pa e dunadó di trabou i tambe pa e sindikato mes ku e ta representá. E ta perkurá pa fungi komo e brùg entre e trahadó i gerensia i vise versa entre e gerensia i e trahadó.
Alabes e ta esun ku ta komuniká ku e sindikato loke ta pasa riba tereno laboral na e empresa pero tambe na nòmber di e sindikato e ta komuniká ku e trahadó tur informashon di balor ku e sindikato kier kompartí ku su miembronan. E shòpsteward pa hasi e trabou aki e mester ta bon ekipá i esei ta responsabilidat di e sindikato pa kontinuamente e ta formando e shòpteward pa e por hasi su trabou mas mihó posibel. P’esei mi ta aploudí ku durante tres dia den e siman aki 37 shòspteward di AFBW lo partisipá na un kurso di formashon básiko plùs mas un kurso ku lo duna informashon tokante e abilidatnan nesesario pa por negoshá CAO.
E kurso básiko plùs lo ta uno pa refreská esnan ku ya a haña esaki mas esnan nobo, pero alabes e ta bai riba un nivel mas avansá. I e kurso di abilidatnan pa negoshá ta parti integral di e funshon di shòspteward. Al fin al kabo ta nan ta riba flur di trabou, ta nan ta mira i skucha tur loke ta trata kondishonnan i sirkumstansianan laboral. Ta nan por bosiferá mas mihó ku ningun otro e deseonan ku ta biba bou di e trahadónan pero tambe kiko ta e deseonan di e dunadó di trabou pa asina krea un ambiente sano i harmonioso na trabou kaminda kon ku bo drei e o biré te ainda 40 ora pa siman trahadó ku dunadó di trabou ta pasa 8 ora pa dia, 5 dia pa siman huntu ku otro. Ta nan ta karga e kompania, e dunadó di trabou ku su kapital i su organisashon i e trahadó ku su konosementu, eksperensha, kreatividat, motivashon i dedikashon. Pues kondishonnan laboral tantu primario, esta salario ets., pero tambe esnan sekundario ku enfoke riba seguridat i salú di e trahadó ta di gran importansia pa trabou ta un alegria i no un kastigu. E trahadó ku ta bai ku smak trabou i e dunadó di trabou ku ta trata e trahadó ku rèspèt, rekonosimentu i rekompensa hustu lo tin e garantia di un produktividat haltu i mas ku tur kos klientenan kontentu. Ku e kurso aki tambe AFBW ta konstruyendo kontinuidat i stabilidat di e organisashon sindikal. Ata un lema pa pensa riba dje durante e siman aki : “Konstrui riba konfiansa, guiá pa trato hustu i empoderá pa komunikashon habrí, huntu nos ta konstrui un ambiente di trabou mas fuerte i ku mas rèspèt i rekonosementu.”