KRALENDIJK – E ekipo di futbòl nashonal di Boneiru a anunsiá e selekshon pa e partidonan benidero den Concacaf Nations League. E ekipo di e entrenadó di e ekipo nashonal, Rilove Janga, ta hunga entre 25 di sèptèmber i 5 di òktober kuater wega.
Bonaire ta hunga den Liga B, grupo C, huntu ku Cuba, Grenada i Saint Kitts i Nevis. Ta hunga e promé dos weganan na Basseterre na Saint Kitts i Nevis. Despues e ekipo ta bai Trinidad i Tobago.
Boneiru ta kuminsá djabièrnè 25 di sèptèmber pa 20.00 or’ kontra Saint Kitts i Nevis. Djaluna 28 di sèptèmber pa 17.00 or’ ta sigui e partido ku Cuba. Despues Boneiru ta hunga djabièrnè 2 di òktober pa 20.00 or’ kontra Grenada. Djaluna 5 di òktober tin atrobe un wega kontra Grenada riba programa pa 20.00 or’.
E promé dos partidonan ta hunga den SKNFA Technical Center na Basseterre. E partidonan kontra Grenada ta tuma lugá den Hasely Crawford Stadium na Port of Spain.
Janga a skohe 23 hungadó den su selekshon. Nan ta Christopher Isenia, Jaydelmar Jansen, Suerainy Coffy, Jevairo Pengel, Timothy Muller, Rayginio Martina, Fabio Hierck, Berry Sonnenschein, Marshelon Pourier, Myron Bostdorp, Rowendley Martijn, Rayvion Simon, Ayrton Cicilia, Milan Blanken, Railey Martijn, Denyor Cicilia, Ninho Felicia, Shi-Jon Martina, Devin Koorn, Robin Cijntje, Sammir Ramos, Jonas Lafeber i Shedwin Martina.
Despues di e seri aki Nations League ta kontinuá na luna di novèmber. Kada ekipo ta hunga den Liga B den e fase di e grupo na tur seis wega.