KRALENDIJK – Siman pasá e selekshon di landamentu a regresá di un siman spesial na Barbados, kaminda shete landadó a partisipá na un torneo internashonal di landamentu. Fuera di prestashonnan deportivo e biaha tabatin komo meta tambe desaroyo personal, team building i deskubrí e isla Karibense.
Na tur 355 landadó di entre otro Barbados, Anguilla, St. Vincent, Nevis i Boneiru a partisipá. Den e kompetensia fuerte internashonal e landadónan a mustra nan mihó banda. A landa vários rèkert personal i a haña eksperensia balioso di kompetensia.
Tambe a logra bunita lugá riba podio. E ekipo di estafeta riba 4x50 meter estilo liber a konkistá un medaya di bròns den e kategoria 15 te ku 17 aña. Individual tambe a optené diferente medaya.
Ounke e resultadonan deportivo a forma un parti importante di e biahe, e estadia na Barbados a ofresé muchu mas ku kompetensia so. E grupo a bishitá entre otro e Famoso Harrison’s Cave i e históriko George Washington House. Durante un rekorido riba e isla e landadónan a sera konosí ku e naturalesa impreshonante i e liñanan di kosta karakterístika di Barbados.