KRALENDIJK – Servisio di Supervishon i Mantenshon (DTH) a kuminsá ku akshonnan di mantenshon kontra uso ilegal di tereno públiko na Boneiru. Siman ku a pasa a kita bòrchinan di propaganda na Belnem i Sabadeco i a kita barankanan for di tereno di gobièrnu na Playa Lechi.
A ehekutá e trabounan na Playa Lechi den koperashon ku STINAPA. DTH ta enfatisá ku ta prohibí pa pone artefaktonan riba tereno públiko sin outorisashon òf pèrmit.
A atvertí delantá
E akshonnan ta forma parti di un trayekto di mantenshon mas largu. Den e di dos i di tres kuartal di 2025 DTH a parti kartanan di informashon kaba na habitante- i empresarionan den e área di Sabadeco i Punt Vierkant. Despues a sigui inspekshon i kartanan di atvertensia. Asina esnan en kuestion a haña chèns promé pa nan mes solushoná e situashon.
Kiko no ta pèrmití
DTH ta señalá ku regularidat ku personanan ta hasi uso di tereno públiko sin pèrmit. Ehèmpelnan ta ponementu di baranka, baki di mata, palu òf staka riba stupi, i sera e tereno ku kadena sin pèrmit. Esaki por kousa molèster, blòkia e espasio públiko i krea situashonnan peligroso pa siguridat den tráfiko.
DTH ta hasi un yamada riba habitante- i empresarionan pa nan mes deshasí di artefaktonan ku ta pará riba tereno públiko sin pèrmit. Esun ku no hasi esaki ta kore riesgo ku DTH ta hasi esaki durante kontrolnan.
Por hasi petishon pa un pèrmit di prekario via e website di gobièrnu di Boneiru.