KRALENDIJK – Èks-diputado i habitante sosialmente enbolbí Anjelica Cicilia a entregá un reakshon ofisial riba e Proyekto-Strategia di Adaptashon di Klima Nashonal 2026 (Ontwerp-Nationale Klimaatadaptatiestrategie 2026 (NAS’26). Segun su punto di bista e ta boga pa e interesnan di Karibe Hulandes dentro di e maneho nashonal di klima ta mas fuerte ankrá i e ta pidi pa palabrashonnan di ehekushon konkreto pa Boneiru, Sint Eustatius i Saba.
Cicilia ta yama danki pa e echo ku e strategia di e proyekto ta aserká adaptashon di klima komo un tarea kolektivo i di hopi aña pa henter Hulanda. Aki e ta haña positivo ku ta inkluí Karibe Hulandes eksplísito i ku ta rekonosé e retonan klimatológiko spesífiko di e islanan.
Segun Cicilia e desaroyo aktual di e strategia nashonal ta brinda un chèns úniko pa uni ku e plannan lokal eksistente, manera Plan di Klima Boneiru i e Vishon di Struktura Boneiru nobo. Sinkronisando e dokumentonan aki mihó ku otro, por integrá adaptashon di klima strukturalmente den e koperashon entre Reino i Entidat Públiko Boneiru, segun Cicilia.
Den su reakshon e ta menshoná kuater punto di atenshon importante. Ta boga por ehèmpel pa un programa di ehekushon di mas aña ku palabrashon kla definí tokante responsabilidatnan, finansiamentu i supervishon. Segun Cicilia e direkshon mester keda enfátikamente serka e entidatnan públiko, di manera ku konosementu i nesesidatnan lokal ta dirigí. Tambe e ta mustra riba falta di kapasidat di ehekushon riba e islanan i e importansia di sosten struktural banda di medionan finansiero.
Cicilia ta pidi atenshon tambe pa temanan manera seguridat di awa, rekuperashon di naturalesa i konstrukshon di bibienda resistente na nos klima. E ta menshoná entre otro fangumentu di awa di yobe, rehabilitashon di dam- i roinan, protekshon di refnan di koral i palí mangel i ekologisá barionan komo medidanan ku por mehorá tantu resistensia di klima komo kalidat di bida.
Mas aleu e ta enfatisá ku kambio di klima no ta stòp na frontera. P’esei e ta boga pa koperashon mas estrecho i interkambio di konosementu ku Aruba, Kòrsou i Sint Maarten pa oumentá resistensia di henter e parti Karibense di Reino.
Finalmente Cicilia ta suprayá e prinsipio di igualdat dentro di Reino. Habitantenan di Karibe Hulandes mester por konta riba un nivel similar di protekshon kontra riesgonan di klima komo habitantenan di Hulanda Europeo, teniendo kuenta ku e sirkumstansianan spesífiko di e islanan, segun Cicilia.
A manda e punto di bista pa Ministerio di Infrastruktura i Gestion di Awa i a kompartí kopia ku entre otro Konseho Insular di Boneiru, Kolegio Ehekutivo di Boneiru i diferente ministerio. Cicilia ta spera ku e stategia definitivo di adaptashon di klima lo kontribuí na un desaroyo duradero i prepará pa futuro di Boneiru i e otro islanan Karibense dentro di Reino.
Lesa aki e remetido punto di bista A. Cicilia riba e Ontwerp-Nationale Klimaatadaptatiestrategie 2026