KRALENDIJK – E basketbolista Boneriano Aïsha Van Haute ta kontinuá su karera deportivo i eskolar na Merka. Aña eskolar benidero e ta bai Winston-Salem Christian School den e estado Merikano North Carolina, kaminda e ta bai forma parti di e programa studiante-atleta di e skol.
Pa Van Haute e kambio ta nifiká un paso nobo den su desaroyo komo basketbolista. E último añanan el a representá Boneiru i tambe el a haña eksperensia via Asosiashon di Basketbòl pa Hende Muhé di Kòrsou (WBAC). Segun e Federashon di Basketbòl Boneiru (BBF) su partida pa Merka ta e resultado di entrenamentu i esfuerso di hopi aña largu.
Segun e bònt di basketbòl Van Haute sinembargo no a pone su stèmpel solamente deportivamente riba e isla. Dia el a bini Boneiru, no tabatin tim ofisial di mucha muhé i tampoko tabata eksistí kompetensia apart di basketbòl pa mucha muhé. Pa por a trein tòg, el a djòin e muchanan hòmber.
Su situashon a pone BBF pensa riba posibilidatnan pa otro mucha muhé ku tambe ke hunga basketbòl. E bònt a puntra su mes: “Kiko si e siguiente mucha muhé talentoso no mester superá e mésun opstákulonan mas?”
For di esei a originá She Got Game, e promé programa strukturá di basketbòl di BBF pa mucha muhé na Boneiru. Ounke ainda no tin kompetensia ofisial pa mucha muhé òf no tin tim apart di mucha muhé, mientrastantu mas mucha muhé ta partisipá na aktividatnan di basketbòl.
BBF ta spera ku ku esaki porfin ta nase un sitio struktural pa basketbòl pa mucha muhé na Boneiru. Ta mira Van Haute komo un di e hungadónan ku tambe a pone e desaroyo aki kana.
Komo rekonosementu pa su ròl BBF a nombr’é komo e promé Embahador ofisial di She Got Game Boneiru. For di Merka e ta keda asosiá ku e inisiativa ku mester hasi generashonnan nobo di mucha muhé entusiasmá pa basketbòl.