KRALENDIJK – No a realisá ampliashon di fasilidatnan di tènis di bich na Boneiru ainda ku kuater kancha èkstra. Direktor di INDEBON, Terrence de Jongh ta laga sa ku e proyekto ta den moveshon si. Un parti di e ofertanan a drenta mientrastantu i fin di otro siman tin un sita nobo planiá. E santu nesesario sí ta disponibel kaba segun e direktor.
De Jongh a anunsiá anteriormente ku mester ámplia e parke na Rudy Boezem na djesdos kancha total. Tambe tin dos kancha di tènis di bich na Rincon riba planifikashon. Pa e kuater kanchanan èkstra mester regla sinembargo diferente komponente.
“Mi tin algun oferta kaba. Fin di otro siman nos tin un sita. It’s moving”, De Jongh ta bisa. Segun de Jongh no ta trata solamente di santu. Mester regla e konstrukshon i traslado di santu, palunan di bich, palunan pa iluminashon, iluminashon mes i nètnan tambe. “Asina hopi kos ta sosodé na mésun momento.”
Pa esaki e proseso ta tuma mas tempu ku a spera na prinsipio. E santu ku mester pa e ampliashon t’ei kaba segun e direktor di Indebon.
Tènis ta keda atras
E situashon rondó di e kancahanan di tènis públiko na Boneiru ta ménos konkreto. E estado di diferente kancha ta punto di preukupashon pa basta tempu kaba. Habitantenan ta usa e aktual kanchanan na Eddy’s hopi i nan ta bon mirá e úniko fasilidat deportivo tambe pa turistanan, pero nan ta den mal estado. Pa motibu di mantenshon atrasá partinan di e kanchanan ademas a bira peligroso.
Hustamente tènis ta hopi importante pa De Jongh. Añanan largu e tabata aktivo den e deporte i ta rekonosé ku e situashon ta asina pa basta tempu kaba. Riba e pregunta pakiko, apesar ku e sa esei, ainda por mira tiki adelanto, e ta kontestá ku tin “many things” ta pasando. E ta keda optimista pa futuro: “Pero mi ta mira un lus bèrdè na horizonte.”
Plannan konkreto òf un planifikashon pa renobashon di e kanchanan di tènis e no por duna ainda. “Pendiente. Nos ta yega einan”, segun De Jongh.
E direktor ta indiká ku aktualmente Indebon ta hasiendo trabounan na diferente sitio pareu. Asina por ehèmpel ta trahando na mantenshon i desaroyo di e parke di mucha na skol di Rincon.
Tambe trabounan a kuminsá mientrastantu na fèlt di beisbòl AMAS banda di Jossy Boekhoudt Ballpark. “Nos a kuminsá ku renobashon na e fèlt di beisbòl di AMAS”, De Jongh a laga sa djaluna.