KRALENDIJK – Gezaghèber di Boneiru a stipulá un maneho nobo pa pidi pèrmit pa por karga un arma di kandela. Ku esaki, e paro temporal pa petishonnan nobo pa un pèrmit ta keda anulá i habitantenan por hasi petishon atrobe pa importá, eksportá òf poseé un arma di kandela pa metanan pèrmití.
E maneho nobo ta introdusí kondishonnan di siguridat mas estrikto pa stimulá poseshon responsabel di arma di kandela i mehorá siguridat na Boneiru.
E maneho a keda prepará den konsultashon ku stakeholdernan i den kordinashon ku e partnernan den Triángulo Boneiru. E maneho nobo ta regulá solamente poseshon legal di arma di kandela i no ta dirigí riba e problemátika di arma ilegal.
Entre e kondishonnan nobo tin e obligashon pa entregá un deklarashon médiko, komprobá konosementu i maneho seif di arma di kandela, i kumpli ku e reglanan pa e tipo di arma i munishon pèrmití. Tambe tin reglanan pa skopèt di aire, arma di airsoft i paintball pa prevení maluso.
Un pèrmit ta bálido pa un aña i mester renová anualmente. Petishonnan pa renovashon por entregá entre 1 di sèptèmber i 15 di òktober 2026. Ademas, di awor en adelante ta posibel pa entregá na mes momentu tantu e petishon pa un Deklarashon tokante Kondukta (VOG) komo e petishon pa un pèrmit di arma di kandela.
Mester entregá arma na tempu
Persona ku tin un arma di kandela sin un pèrmit bálido òf ku un pèrmit ku a kaduká, por entreg’é na polis te ku 31 di ougùstùs 2026. Despues di e fecha ei, poseshon di un arma sin pèrmit bálido por resultá den persekushon penal.