KRALENDIJK – Di 10 te ku 17 di òktober ta selebrá Regata Boneiru 2026 pa di 59 biaha na Boneiru. E tema di e edishon aki ta The Sails are Raising! E programa ta konsistí di un siman di kompetensia di nabegá ku barku di bela i otro aktividat akuátiko for di Kas di Regata, un festival kultural den Parke Wilhelmina, kuater anochi di músika bibu den sentro di Kralendijk i un fiesta di klousura na Plaza Machi Mimi.
Fundashon Aquaspeed Bonaire Windsurfers ta organisá e kompetensianan di nabegá ku barku di bela. Di djaluna 12 te ku djabièrnè 16 di òktober ta nabegá den bahia di Kralendijk, dilanti Kas di Regata na Kaya J.N.E.Craane. E dianan di kompetensia ta kuminsá despues di 9’or. Kada kategoria ta nabegá mainta dos kareda kòrtiku i mèrdia unu mas largu.
Na salida ta aparesé botonan piskadó tradishonal ku ta nabegá, yatenan i kategorianan mas chikitu manera Polyvalk, Sunfish i Optimist. Wentsùrfistanan, sùrfdónan di kite i wingfoilernan tambe ta partisipá, meskos ku microboats, modelonan di barku di bela chikitu. Djarason 14 di òktober ta un dia di sosiegu pa e yatenan, e Sunfish i e Optimist. Entrega di premio ta djabièrnè 16 di òktober pa 20.30 or’ riba podio prinsipal.
Por inskribí ainda
Esun ku ke partisipá por inskribí djadumingu 11 di òktober entre 10’or i 14.00 or’ na Kas di Regata. Partisipashon ta $ 40 pa persona, pa yatenan $50. E mésun anochi ei pa 18.00 or’ tin e apertura ofisial di Regata na Kas di Regata.
Landa bai Klein Bonaire
Djadumingu 11 di òktober Fundashon Jong Bonaire ta organisá e landamentu anual Landa bai Klein Bonaire. Partisipantenan ta landa 800 meter di Eden Beach pa Klein Bonaire i por landa despues bèk, na tur 1,6 kilometer. E parti di kompetensia ta kuminsá 07.30 or’, pa 9’or ta sigui e landamentu rekreativo. Esun ku no ta landa bèk, por bai bèk ku un di e taksinan akuátiko di e organisashon.
Partisipashon kosta $30, i ta inkluí un t-shirt i un number di start. Esun ku no ta landa tambe por kumpra un t-shirt. E organisashon ta mustra ku partisipantenan mester ta bon di salú i den bon kondishon i ta konsehá pa pone zeta kontra kimá di solo i bisti sapatu di awa.
Keinta Kaya den Parke Wilhelmina
E programa di festival ta kuminsá ku Keinta Kaya, di 11 te ku 13 di òktober na Parke Wilhelmina. Artista- i músikonan lokal tin einan un programa kultural.
Festival op Wilhelminaplein Festival na Plaza Wilhemina
Kuater anochi riba podio prinsipal
Di 14 te ku 17 di òktober artistanan lokal, regional i internashonal ta presentá riba podio prinsipal den Sentro di siudat. Un di e nòmbernan ta Poke, ku segun e organisashon ta aktua pa promé biaha na Boneiru. Tambe tin entre otro Jeon, Caché Deluxe, Freddy Morreira i ONE Flavaz riba e programa, komplementá ku artistanan lokal, dj-nan i aktuashonnan kultural.
Klousura na Plaza Machi Mimi
Djasabra 17 di òktober ta sigui Regatta Boat Party na Plaza Machi Mimi. E dia ei tin tambe aktividatnan akuátiko i e selebrashon di klousura di e festival riba programa.
Boat Party Boat Party
Durante e siman di festival tin stèntnan di kuminda lokal i tin empresario-, artista- i organisashonnan sosial presente. Aquaspeed Bonaire, Massive Productions Bonaire B.V., den koperashon ku INDEBON, entidat públiko Boneiru i Ofisina di Turismo Boneiru ta organisá Regata. E tema di e edishon aki ta The Sails Are Raising! E evento ta vinkulá ku e laso di e isla ku laman i ta trese habitante- i bishitantenan huntu den ambiente di nabegá ku barku di bela, kultura i músika.