KRALENDIJK – Kuantu sushi Boneiru ta generá realmente? Ta parse ku ni e investigashon amplio di KPMG tokante Selibon no por duna un kontesta definitivo riba e pregunta aki.
Den e rapòrt, KPMG ta indiká eksplísitamente ku e registrashon aktual di e diferente fluhonan di sushi no ta sufisientemente konfiabel pa optené un bista eksakto di e kantidat di sushi den kada kategoría. Ku esaki, e investigashon ta pone atenshon riba un problema fundamental den maneho di sushi na Boneiru: hopi desishonnan importante di polítika ta wòrdu tuma miéntras ku e datonan basiko no ta kompletamente konfiabel.
Segun KPMG, Selibon sí tin un balanza na sentro di sushi na Lagun, pero e práktika diario ta resultá den midimentu ineksakto. Hopi biaha trùk ta trese karganan ku diferente tipo di sushi mesklá, ku despues mester wòrdu asigná administrativamente na un solo kategoría di sushi. Segun e investigadónan, esaki ta laga solamente un bista limitá di e komposishon real di e diferente fluhonan di sushi.
E problema ta regresá na varios lugá den e rapòrt. KPMG mes ta nombra e kalidat di registrashonnan di volúmen komo unu di e limitashonnan mas importante di e investigashon. Tambe ta wòrdu señalá ku e informashon disponibel tokante volúmennan, gastunan i dato operashonal no ta kompletamente òf konsistente den tur kaso.
Konsekuensianan grandi
E konsekuensianan ta mas grandi ku loke por parse na promé bista. E rapòrt ta kontené kalkulashonnan amplio di e gastunan pa kada fluho di sushi, e invershonnan nesesario i e eksploitashon futuro di Selibon. Sin embargo, e kalkulashonnan aki ta basá tambe riba prognósis, aproksimashon di e kantidat di sushi ku ta wòrdu prosesá kada aña.
KPMG ta skirbi ku spesialmente e volúmennan pa kada kategoría di sushi ta forma un fuente importante di inseguridat. E investigadónan ta enfatisá ku e sistema aktual pa midi i atribuí tonelahe na diferente fluhonan di sushi no ta sufisiente pa optené un bista konfiabel i eksakto.
Esaki no ke men ku e konklushonnan di e rapòrt no tin balor. KPMG a evaluá e datonan entregá pa Selibon mediante entrevista, bishitanan di trabou, komparashon i sabedoria i profesional. P’esei e investigadónan ta papia di un evaluashon di plousibilidat i konsistensia di e informashon disponibel. Na mes momentu, e firma di kontabilidat i konseho ta enfatisá ku no tabata trata di un audit ni di un verifikashon kompleto di tur e datonan relevante.
Pa Boneiru, e konklushonan aki ta suprayá prinsipalmente e importansia di mihó registrashon i monitorisashon di e diferente fluhonan di sushi. Sin datonan konfiabel, ta keda difísil pa determiná eksaktamente kua fluhonan di sushi ta kosta mas, kua métodonan di prosesamentu ta mas efektivo i kon mester determiná tarifanan den futuro.
Datanan konfiabel ta indispensabel
Voral awor ku Boneiru ta enfrentá invershonnan di mionario i ku e meta ta pa stòp ku depositá sushi na Lagun no mas tardá ku fin di 2028, datonan konfiabel ta konsiderá segun e rapòrt komo un fundeshi indispensabel pa e maneho futuro di sushi na Boneiru.