THE BOTTOM – A kambia e búskeda di e kanadó Hulandes perdí na Saba, Erik Matthijsen, despues di tres dia kompleto di búskeda di un akshon di reskate pa un mishon di rekuperashon. Ta kasi imposibel ku lo haña Matthijsen bibu ainda.
A mira Matthijsen pa último biaha den e área di Well’s Bay. Djaweps, djabièrnè i djasabra a busk’é sin resultado. Ora a redusí e esfuersonan di e búskeda, e tabatin 72 ora perdí kaba. Timnan médiko a konsehá outoridatnan pa kambia e karákter di e akshon di búskeda a base di e lapso di tempu aki. Apesar di e esfuerso ámplio e akshon a keda sin resultado.
Tim di USAR na kaminda
E akshon di búskeda ta sigui. Un tim di USAR (Urban Search and Rescue), konsistiendo di djesun persona i nuebe kachó, ta planiá pa yega awe pa yuda ku e mishon di rekuperashon.
Gezaghebber Jonathan Johnson a anunsiá e notisia via un mensahe di video riba media sosial. “P’esei e karákter di nos búskeda a kambia di reskate pa rekuperashon,” segun Johnson.
Fuente: deklarashon gezaghebber Saba