KRALENDIJK – Luna di yüni ta dediká rònt mundu na inklushon, igualdat i rèspèt pa tur hende. Na Boneiru tambe e balornan akí ta para sentral durante Pride Week, ku ta tuma lugá for di 13 te ku 21 di yüni 2026.
E tema di Pride Bonaire e aña akí ta ‘Uní’. Un yamada pa konekshon, solidaridat i rèspèt pa otro.
Kolegio Ehekutivo di Entidat Públiko Boneiru ta enfatisá importansia di un sosiedat kaminda tur hende por sinti nan mes bon biní, sigur i respetá. Boneiru ta un komunidat kaminda hende di diferente desendensia, konvikshon i manera di biba ta biba huntu. Hustamente e diversidat ei ta hasi nos isla fuerte.
Tur hende meresé pa trata nan ku dignidat i rèspèt, sin importá koló di kueru, orígen, etnisidat, kreensia, sekso òf orientashon seksual. Rèspèt pa otro ta forma base di un komunidat sólido. Huntu nos ta kontribuí na un sosiedat kaminda rèspèt i union ta para sentral.
Frankesa i rèspèt
Pride Week ta ofresé un momento pa reflehá riba e balornan akí i riba loke ta konektá nos. Kolegio Ehekutivo ta stimulá habitante pa sigui trata otro ku frankesa i rèspèt, i pa sigui konstruí huntu na un Boneiru kaminda tur hende por ta nan mes i sinti nan mes na kas.