KRALENDIJK – E sektor kultural i kreativo ta hunga un papel importante den desaroyo di Boneiru. Artistanan, kreadonan i empresarionan den e sektor kreativo no solamente ta enrikesé bida kultural riba e isla, sino nan ta kontribuí tambe na sektornan manera turismo, eventonan, enseñansa i servisio empresarial. Pa fortalese e kontribushon aki aún mas, Qredits Boneiru, Platform ACCT i Cultuur + Ondernemen ta traha huntu pa stimulá desaroyo di konosementu empresarial, kresementu profeshonal i akseso na finansiamentu den e sektor.
Un ehèmpel resiente di e esfuerso komun aki ta e di dos edishon eksitoso di e ‘Qreative Business Academy’ (QBA). Durante e programa aki, partisipantenan a haña instrumentonan práktiko riba emprendementu, merkadeo, planifikashon finansiero i desaroyo empresarial. Ademas, nan a traha riba nan plan di negoshi i plan finansiero, loke ta yudanan traha un base mas fuerte pa nan futuro komo empresario. Platform ACCT a hasi partisipashon mas aksesibel dor di subsidiá 50% di e gastunan di partisipashon, mientras ku Cultuur + Ondernemen a kontribuí na e kontenido di e programa dor di brindá konosementu i eksperensia riba emprendementu e sektor cultural i kreativo.
E kolaborashon entre Qredits Boneiru i Cultuur + Ondernemen ta eksistí for di 2021. Empresarionan den e sektor kultural i kreativo na Boneiru, Saba i Sint Eustatius por hasi uso di e BES-Cultuurlening, un fasilidat di finansiamentu ku ta yudanan invertí den desaroyo, profeshonalisashon i kresementu di nan empresa. Kombiná ku entrenamentu i guia, esaki ta forma un pakete duradero di apoyo pa empresarionan den diferente fase di nan desaroyo.
Qredits Boneiru ta ekspresá su apresio pa e kolaborashon ku Platform ACCT i Cultuur + Ondernemen, i pa e impakto ku e organisashonnan a logra huntu te ku awor. Dor di ofresé konosementu, eksperensia, guia i apoyo finansiero, empresarionan den e sektor kultural i kreativo ta haña mas oportunidat pa transformá nan talento den empresanan sostenibel.
E tres organisashon ta kompartí e konvikshon ku invershon den desaroyo empresarial den e sektor kultural i kreativo no solamente ta benefisiá empresarionan individual, pero Boneiru kompletu. Un sektor kultural i kreativo fuerte ta stimulá inovashon, ta krea oportunidatnan ekonómiko, ta fortalesé identidat di e isla i ta kontribuí na un klima atraktivo pa biba, traha i desaroyá.
P’esei, Qredits Boneiru, Platform ACCT i Cultuur + Ondernemen ta invitá komunidat, sektor empresarial, stipuladó di maneho públiko i otro stakeholdernan pa para un momento i rekonosé balor di e sektor kultural i kreativo. Apoyo na emprendementu kultural i kreativo por tuma diferente forma: komo partner, kliente, invershonista, sponsor òf konsumidó. Dor di sostené kreadonan lokal, organisashonnan kultural i empresarionan kreativo, nos ta invertí huntu den un ekonomia resiliente, un oferta kultural riku i un futuro sostenibel pa Boneiru.