KRALENDIJK – For di desèmber 2025 Entidat Públiko Boneiru (EPB) ta trahando riba un Canon pa Boneiru. E proyekto akí ta parti di e Agènda di akshon Pasado di Sklabitut i ehekutá pa direktorado Komunidat i Kuido.
E Canon ta un liña di tempu moderno di Boneiru. Bo ta mira i tende akí akontesimentunan importante, personanan, lugánan, edifisionan, muzik, baile i storianan. Asina ta krea un lugá kla i aksesibel, kaminda kultura i historia di e isla ta visibel.
Kada parti di historia tin un símbolo. E símbolo akí yama un ‘bentana’. Segun manager di programa Kultura i Patrimonio, señor Daudi Cijntje, kada bentana di e Canon di Boneiru ta sirbi komo portal pa pasado i kultura di e isla.
Por ehèmpel, un bentana ta hiba bo na orígen di Boneiru. Un otro bentana ta mustra kon e promé habitantenan ta mara pa promé bia ku nan kanoa riba e isla. Òf tabata sende nan kandela na Lac ku bahada di solo, pa prepará nan piská fresku ku nan a kaba piska.
Ta traha e Canon pa habitantenan di Boneiru, partikular e hóbennan ku ta lantando akí. Asina nan ta siña konosé nan propio historia i kultura, i di nan antepasadonan. Ku orguyo nan ta demostrá nan identidat boneriano. Esaki ta yuda nan sinti nan mes konektá i traspasá esaki pa nan yunan. Sa ken bo ta, di unda bo ta bin i ken bo antepasadonan tabata, ta hasi bo mas fuerte. E ta duna bo mas konfiansa den bo mes i ta yuda bo bira mas independiente. Nos no kier desaroyá e Canon nos so, pero tambe huntu ku bo.
Kolaborashon ta importante.
Skol-, museo-, instansia- di patrimonio i organisashonnan sosial por partisipá na e Canon di Boneiru. Nan ta kontribuí na mas konosementu tokante kultura, historia i patrimonio di Boneiru.
Ta traha e bentananan den e Canon huntu ku komunidat i ekspertonan lokal. No ta skohe solamente e tópikonan, sino ta detayá e storianan tambe. Pa esaki ta organisá diferente evento i enkuentro. Asina tur hende por yuda pensa i yuda disidí riba e storianan ku konta. Denter di poko ta anunsiá e promé, ku ta tuma lugá riba 17 di mei na Fontein. EPB den e periodo benidero lo tene komunidat na altura di tur desaroyo tokante e Canon di Boneiru.
Bo tambe ta deseá di partisipá den trahamentu di e Canon? Manda un e-mail pa: daudi.cijntje@bonairegov.com