SALENTO – Segun e korant Kolombiano El quindiano a topa kurpa sin bida di e turista Hulandes di 41 aña Marlies G., ku desde 25 di mei tabata perdí na Colombia. Esei outoridatnan den e departamento Quindío a konfirmá.
A topa ku e kurpa di e hende muhé djadumingu mainta den un riu chikitu den Palestina, un zona eksterior di kampo, serka di e sitio turístiko Salento. Segun outoridatnan Kolombiano Marlies tabata keda na Hostal Coffee Tree Boutique na Salento. Riba 25 di mei el a sali for di e establesimentu pa un bishita na e plantashon di kòfi El Ocaso, un distansia di kana di mas o ménos un ora for di e kaminda ku e tabata keda.
No a tende nada mas di dje for di ora el a sali. E no a yega tampoko pa un paseo riba kabai ku tabata planiá pa algun dia despues. Ora a resultá ku e no a yega e plantashon di kòfi nunka, a start un akshon di búskeda.
Jaime Andrés Pérez Cotrino, sekretario di gobièrnu di Quindío, a konfirmá ku a haña e kurpa di e hende muhé ku tabata pèrdí. Outoridatnan a start un investigashon di e sirkumstansianan rondó di su fayesimentu.