Marc Bakker en Lotte Rothweiler ta gana di nuebe edishon di Guardian Walk & Run Bonaire

KRALENDIJK - Guardian Walk & Run Bonaire a pone djadumingu un rèkert nobo di partisipante pa e di nuebe edishon ku 530 partisipante. E evento deportivo popular a hala tantu koredónan eksperensiá komo kanadónan rekreativo i tabatin tambe un partisipashon grandi di mucha.

Segun e organisashon e evento tabata eksitoso i sin problema partikular. Un kontribushon importante na e partisipashon di hubentut a bini di asosiashon di atletismo SV Athene, ku tabata aktivamente enbolbí den e Kids Run.

Ganadónan

Serka hende hòmber Marc Bakker tabata di nobo esun mas lihé. El a kore 8 kilometer den èksaktamente 31 minüt. Serka hende muhé e viktoria a bai pa Lotte Rothweiler, ku a pasa e finish den un tempu di 34 minüt i 55 sekònde.

Durante e Kids Run a lucha tur ku tin pa e lugánan riba podio. Pa 3 kilometer serka mucha hòmber Riczard tabata esun mas lihí ku un tempu di 14 minüt i 13 sekònde. Serka mucha muhé Dwainnisa Blanken a gana den 14 minüt i 5 sekònde.

Pa loke ta trata e partisipantenan mas hóben riba 1 kilometer e viktoria pa e mucha hòmbernan a bai pa Aevon Estanista, ku a finalisá den 4 minüt i 45 sekònde. Rosa Linders tabata esun mas lihé serka e mucha muhénan ku un tempu di 5 minüt i 20 sekònde.

Ku un kantidat rèkert di partisipante di nobo i un organisashon eksitoso Guardian ta wak ku satisfakshon bèk riba e di nuebe edishon. Mientrastantu tur bista ta dirigí riba otro aña, ora e evento ta selebrá su di djes aña.

Mas den kurso di e siman aki ta kompartí e lenk di pòtrètnan aki

Wak tur resultado di e evento aki

Hopi interes

Por a nota interes grandi pa e evento delantá kaba. Pa motibu di e kantidat grandi di registrashon e organisashon mester a sera e página di inskripshon algun dia promé ku e dia ofisial ku e periodo di inskripshon ta sera. Pa e edishon di hubileo na 2027, ora ta tene e di djes Guardian Walk & Run, e organisashon ta prepará pa un kresementu adishonal di e kantidat di partisipante.

Guardian a bisa ku otro aña nan ke tuma medidanan èkstra pa e bòternan di plèstik, ku ta parti durante e kareda, yega mihó den e bakinan di sushi ku ta destiná pa esei. Na final di e kareda a tene un akshon di limpiesa ámplio kaminda boluntarionan no a kolektá solamente bòternan ku a keda atras, pero tambe a piki sushi di kaya kantu di e ruta.