KRALENDIJK – Boneiru tin ku tene kuenta ku preis mas haltu di kombustibel for di 5 di yüni. Dia 3 di yüni ta anunsiá e tarifanan nobo.
E oumentu ku nan ta verwagt tin di haber ku desaroyonan riba merkado internashonal di petroli. Tenshon mundial i preis mas haltu di petroli ta sòru ku e preis di kompra di kombustibel na Boneiru tambe ta subi. Segun espektativa ta bai ripará esaki na pòmp di gasolin.
Desaroyonan internashonal ta empuha preisnan
Tur luna nan ta kalkulá preis di kombustibel di nobo na Boneiru. Den esaki nan ta wak e preis di kompra internashonal, gastu di transporte for di Kòrsou pa Boneiru, almasenamentu, distribushon, akseins i ABB. Kambio den e gastunan akí tin influensia direkto riba e preis final.
Prinsipalmente preis di gasoil i disel ta bou di preshon aktualmente. Preis mas haltu di kombustibel por tin konsekuensia pa kasnan di famia, empresarionan, kompanianan di transporte i otro organisashonnan ku ta dependé di transporte.
Posibel impakto pa konsumidó i empresarionan
Diputado Mohamedjoenoes ta konsiente ku subida di preis por afektá habitantenan i empresarionan. “Nos a tuma nota di e oumentu di preis ku ta wòrdu sperá i nos ta den kontakto ku e ministerio responsabel na Hulanda pa traha huntu riba posibel medidanan mitigante. Aunke desaroyonan internashonal ta determiná un gran parti di e preisnan di kombustibel, nos ke eksplorá kua posibilidatnan tin pa limitá e efektonan negativo. Na mes momentu, nos ta haña ku ta importante pa informá nos komunidat na tempu i ku transparensia tokante kon e preisnan aki ta keda determiná i na momentu ku tin kambio drenta na vigor.”