WILLEMSTAD – Sektor di penshun di e union monetario Kòrsou i Sint-Maarten ta manehá na tur un bien di 9,5 miar florin. Esei e promé dokumento di Banko Sentral ta mustra. Ku esaki e sektor ta representá 35 porshento di tur aktiva finansiero den e área.
E sifranan ta mustra ku djesdos fondo di penshun huntu ta konsistí di 15.000 miembro aktivo, 17.000 penshonado i 12.000 partisipante inaktivo. E total di kompromisonan di penshun ta konsistí pa 86,2 porshento di areglonan di pago fiho. Banda di esei 13,4 porshento ta den areglonan ku un rendimiento garantisá i 0,4 porshento den areglonan di prima tradishonal disponibel.
Grado di kobertura
E fondonan ta yega na 2024 na un grado di kobertura di 111,4 porshento. Ku esaki nan ta mas haltu ku e nivel di 2022, ora e grado di kobertura tabata 103,4 porshento.
8,3 porshento di e fondonan no a kumpli e aña ei ku e eksigensianan di kapital, e mésun porsentahe ku na 2023. Midí riba e union monetario e relashon entre e aktivanan di penshun i e volúmen di e ekonomia ta 102 porshento. Pa Kòrsou so esaki ta 134 porshento i pa Sint-Maarten 33 poshento.
Kartera di invershon
E kartera di invershon ta konsistí pa 34 porshento di obligashon, 26 porshento di akshon, 22 porshento di fiansa i hipotek i 18 porshento di sobrá aktiva.
Di e obligashonnan di den eksterior 81 porshento tin un státus di grado di invershon. Ochentitres porshento di akshonnan di den eksterior ta negoshabel na bolsa, di kua 48 porshento ta pertenesé na e kategoria blue chip
E fondonan a risibí e aña aki 199 mion florin na kontribushon i a paga 392 mion florin na penshunnan. E rendimento riba e bien total tabata 5,6 porshento, kompará ku 7,4 porshento na 2023.
E posishon di likides, midí den porsentahe di medionan di likides disponibel kompará ku e total na aktiva, ta 6,1 porshento. Kompará ku e pagonan di penshun anual esaki ta sali 142,6 porshento
E dokumento ta sigui mustra ku e invershonnan ta fluktua mas fuerte ku den e añanan anterior. E inestabilidat di e rendimentu di invershon den 2024 ta 139,7 porshento, kompará ku 126,3 porshento na 2023 i 76 porshento na 2021.