WILLEMSTAD – E yunan di fundadó di Lovers Oswald van der Dijs Sr. a laga pone embargo preventivo riba fondonan di Lovers Industrial Corporation Curaçao. Ta trata di un embargo di miones ku mester sirbi komo protekshon di e marka Lovers. Esei Èxtra ta trese dilanti.
Wes a disidí di pone e embargo riba 10 di dezèmber despues di un petishon di herederonan Cindy van der Dijs i Oswald van der Dijs Jr. Segun nan e embargo ta nesesario pa motibu di un disputa hurídiko i operashonal di hopi aña kaba pa loke ta trata maneho di Lovers Curaçao.
Pleitu den famia pa basta aña kaba
E herederonan ta bisa ku pa añanan kaba por papia di violashon di e kondishonnan di lisensia di e marka Lovers i di nan derechonan di akshonistanan. Despues di fayesimentu di fundadó Oswald van der Dijs i despues su ruman hòmber Pedro van der Dijs tambe, ku tabatin akshonnan den e empresa, a surgi kambionan signifikante na Lovers Curaçao.
E gerensia aktual lo a tuma akshonnan ku a kondusí na violashon di e akuerdo di lisensia i obligashonnan di organisashon di tur tempu. “E akshonnan aki a eksponé Lovers Curaçao na riesgonan signifikante, ku por trese e empresa i su empleadonan den peliger,” e herederonan ta deklará.
Derechonan eksklusivo na Merka
Lovers Curaçao ta operá pa mas ku dos desenia kaba bou di akuerdonan di lisensia formal ku ta regla uso di tur marka di Lovers, formulanan, diseñonan i propiedat intelektual. E derechonan eksklusivo pa otorgá e lisensianan aki ta pertenesé na Lovers Industrial USA, LLC, ku ta propiedat kompleto di e yunan di e fundadó.
E herederonan ta bisa ku nan a purba hopi aña pa solushoná e situashon dirèkt ku gerensia na un manera amikal. “Na lugá di koperá, e gerensia aktual a usa táktikanan pa retrasá prosesonan, a nenga transparensia i a aktua ku mala fe,” segun Cindy i Oswald van der Dijs Jr.
Mientrastantu e gerensia lo ta sigui probechá si di produktonan ku ta produsí i bende bou di e akuerdo di lisensia sin outorisashon bálido .
E solushon ta serka Lovers Curaçao
E herederonan ta enfatisá ku nan ta keda dediká na e herensia di nan tata i ke pèrkurá pa stabilidat konsistente pa e empresa i su empleadonan. “Esaki tabata semper e deseo i vishon di Sr. Oswald pa Lovers Curaçao,” nan ta deklará.
Segun e yunan di e fundadó e kaminda pa un solushon ta serka Lovers Curaçao mes awor.